Իտալիայի ֆուտբոլի առաջնության ընթացիկ մրցաշրջանի վերջին տուրում «Ռոման» մրցեց «Սպեցիայի» հետ:Մեկնարկից րոպեներ անց «Սպեցիա»-ն գնդակի արագ խաղարկումից հետո բացեց հանդիպման հաշիվը: Աչքի ընկավ Դանիելե Վերդեն: Մինչ թիմերը կգնային ընդմիջման տան տերերը խփեցին նաև երկրորդ գնդակը` գոլն իր ակտիվում գրանցեց Տոմատ Պոբեգան: «Ռոմային» հաջողվեց երկրորդ կեսում խուսափել պարտությունից: Նախ 52-րդ րոպեին հաշվի տարբերությունը կրճատեց Ստեֆան էլ Շարավին, այնուհետ` 85-րդ րոպեին Հայաստանի ֆուտբոլի ազգային թիմի կիսապաշտպան Հենրիխ Մխիթարյանը փրկեց «Ռոմային» պարտությունից: Այսպիսով Մխիթարյանը «Ռոմայի» կազմում Ա սերիայում մասնակցեց 34 հանդիպման, դարձավ 13 գոլի և 11 արդյունավետ փոխանցման հեղինակ:«Ռոման» Սերիա Ա-ի մրցաշարային աղյուսակում զբաղեցրեց 7-րդ հորիզոնականը և իրավունք ստացավ գալիք մրցաշրջանում մասնակցելու Եվրոպա լիգայի խաղարկությանը: Փաստորեն, Հենրիխ Մխիթարյանի վերջին գոլը Հռոմի թիմին պարգևեց եվրագավաթների ուղեգիր։ Հայ ֆուտբոլիստը նվեր մատուցեց «Ռոմայի» նոր գլխավոր մարզիչ Ժոզե Մոուրինյոյին հնարավորություն տալով պայքարել Եվրոպա լիգայում։
«Դժվար տարի էր բոլորիս համար, բայց մենք արեցինք առավելագույնը: Ցանկանում եմ «Ռոմային» առաջիկա տարիներին տեսնել որքան հնարավոր է բարձր, քանի որ երկրպագուներն ու քաղաքն արժանի են դրան»,- խաղից հետո Ֆեյբուքի իր էջում գրել է Մխիթարյանը։ «Սպերցիայի» հետ հանդիպումից առաջ իտալական մամուլում տեղեկություն տարածվեց, որի համաձայն Մխիթարյանն ու Մոուրինյոն համաձայնության են եկել համատեղ աշխատելու վերաբերյալ։ Ավելի ստույգ Tuttomercatoweb պարբերականի համաձայն Մխիթարյանը Ժոզե Մոուրինյոյին համոզել է, որ բոլոր հիմքերը կան իր մարզական կարիերան «Ռոմայում» շարունակելու համար:Պորտուգալացի մասնագետը, ով այս տարվա ամռանը կգլխավորի «գայլերին», հավանություն է տվել այդ մտքին։ Պարբերականի տեղեկություններով՝ նոր պայմանագիրը կքննարկվի առաջիկայում նախատեսվող հանդիպման ժամանակ։Հայ ֆուտբոլիստը իտալական «Ռոմայի» հետ պաշտոնապես պայմանագիր է կնքել 2020 թվականի օգոստոսին։ Պայմանագրի ժամկետը լրանում է 2021 թվականի ամռանը։ Ինչ ճակատագիր է սպասվում Մխիթարյանին։ Փաստենք թերևս հետևյալը։ «Ռոմայի» արդեն իսկ նախկին պորտուգալացի գլխավոր մարզիչ Պաուլու Ֆոնսեկայի գլխավորությամբ Մխիթարյանն անցկացրեց իր կարիերայի լավագույն մրցաշրջաններից մեկը։ Կհամարձակվենք պնդել, որ Մխիթարյանի արդյունավետ խաղի «մեղավորներից» էր նաև Ֆոնսեկան։ Վերջինս վստահելով մեր ֆուտբոլիստին ստեղծեց հնարավորություն որպեսզի նա դառնա թիմի առաջատարը։
Վստահ ենք, որ ավելի դինամիկ և արդյունավետ խաղային մոդելի պարագայում հայ կիսապաշտպանն ընդհանուր առմամբ շատ ավելի հաջող կգործեր։ Ամեն դեպքում Մխիթարյանը լավագույններից մեկն էր, եթե ոչ լավագույնը։ Այնուամենայնիվ Պորտուգալացի մասնագետին գլոբալ առումով այդպես էլ չհաջողվեց բալանսավորել «Ռոմայի» խաղը։ Որոշ դրվագներում Հռոմի թիմը ցուցադրեց հագեցած և դինամիկ խաղ, իսկ որոշ դրվագներում՝ ուղղակի խայտառակ ֆուտբոլ։ Ֆոնսեկային այդպես էլ չհաջողվեց թիմին պատրաստել կարգով հավասար և ավելի ուժեղ թիմերի դեմ հանդիպումներին։ Հեշտությամբ հաղթելով կարգով ավելի ցածր թիմերին՝ «Ռոման» Ա սերիայի առաջատարների դեմ մրցավեճերում ուղղակի ձախողում էր։ Ինչ խոսք, Ֆոնսեկան մասնագիտական որակները որոշակի աշխուժություն հաղորդեցին «Ռոմային», բայց ընդհանուր առմամբ այս մարզչի աշխատանքը իտալական ակումբներում ուղղակի չստացվեց։ Ֆոնսեկան դավանում է հարձակվողական ֆուտբոլ, բայց մենակ հարձակվելով հնարավոր չէ լուրջ հաջողությունների հասնել։ Կարծում ենք պարզ է, որ նոր մրցաշրջանում Մոուրինյոյի գլխավորությամբ կտեսնենք բոլորովին նոր «Ռոմա»։ Նոր մարզիչը կփոխի թիմի խաղային մոդելը նաև փիլիսոփայությունը։ Կտեսնե՞նք արդյոք Մխիթարյանին Մոուրինյոյի մոդելում։ Այս հարցի պատասխանը կիմանանք առաջիկա օրերին։
Չմոռանանք, որ Մխիթարյանի ծառայությունով հետաքրքրված են նաև «Յուվենտուսն» ու «Միլանը»։ Վերջինս երեկ դարձավ Իտալիայի փոխչեմպիոն՝ իրավունք ստանալով մասնակցելու Չեմպիոնների լիգայի խաղարկությանը։ ՉԼ-ի ուղեգիր ձեռք բերեց նաև «Յուվենտուսը», որը առաջնությունն ավարտեց 4-րդ հորիզոնականում։ Ամենահեղինակավոր մրցաշարին մասնակցելու հեռանկարը ինչ խոսք կարող է լուրջ ազդեցություն ունենալ Մխիթարյանի որոշման հարցում։
