Օրերս Ռոբերտ Քոչարյանը հանդիպում է ունեցել առողջապահության ոլորտի ներկայացուցիչների հետ, որտեղ խոսել է ոլորտի համաչափ զարգացման, մարզային բժշկական կենտրոնների զարգացման խնդիրների մասին:
Առողջապահության նախկին նախարար Արարատ Մկրտչյանը, ով հրավիրված չի եղել և չի մասնակցել այդ հանդիպմանը, «Առաջին լրատվական»-ի հետ զրույցում նշեց, որ բնական է, որ ընտրություններից առաջ բոլոր թեկնածուներն էլ տարբեր ոլորտների ներկայացուցիչների հետ հանդիպումներ կիրականացնեն, որպեսզի շոշափեն տրամադրությունները, ոլորտային խնդիրները վեր հանվեն, խնդիրներին լուծումներ առաջարկվեն:
«Ես տեղյակ չեմ եղել այդ հանդիպումից: Ես ուշադիր չեմ հետևել հանդիպմանը, չեմ կարող գնահատական տալ, թե առաջնահերթություններն ինչպիսին են, ինչ շեշտադրումներ են եղել: Ինձ շատ տեղեր չեն հրավիրում ներկայիս կառավարությունը, նախորդները, նախորդների նախորդները: Երևի հետաքրքիր չի իմ կարծիքն իմանալ, դա ինչ մի խնդիր է, որ: 12 հազարից ավելի բժիշկներ կան առողջապահության ոլորտում: Ունենք իր բարդություններով, խնդիրներով շատ կարևոր մի ոլորտ, որտեղ անհրաժեշտ են համապատասխան բարեփոխումներ, որոնք հիմնված կլինեն նպատակային ծրագրերի վրա»,-ասաց նա:
Անդրադառնալով Ռոբերտ Քոչարյանի իշխանության տարիներին առողջապահության ոլորտի վիճակի մասին, Արարատ Մկրտչյանն ասաց. «Այնքանով է կարևորվել ոլորտը, որքանով մարդու առողջությունը համարվել է տվյալ կառավարության համար կարևորագույն խնդիր: Տարբեր ժամանակներում տարբեր թիրախային խնդիրներ են ունեցել կառավարությունները: Բայց 2000-ական թվականներին առողջապահության ոլորտում բավականին փոփոխություններ են եղել, այդ թվում ձեր խոնարհ ծառայի կողմից»:
Հարցին, թե կովիդի դեմ պայքարն ի՞նչ ցույց տվեց, մենք կարողանո՞ւմ ենք պայքարել խնդիրների դեմ, նախկին նախարարը պատասխանեց. «Ինձ թվում է, որ համայն մարդկությունն էր անզոր և տկար Կովիդի դեմ պայքարում, ոչ միայն Հայաստանի առողջապահության համակարգը: Պրոբլեմը բարդ ու անսպասելի էր, անծանոթ էր և ողջ աշխարհը չէր կարողանում դրա դեմ պայքարել: Մինչև այսօր էլ շատ-շատ պրոբլեմներ կան: Հայաստանը յուրահատուկ չի, որ շատ վատ էր կամ շատ լավ էր:
Ամբողջ աշխարհում տեղեկատվական տեսանկյունից, օգտագործվող միջոցների տեսանկյունից, կովիդի դեմ պայքարը պարզ է: Այնպես չի, որ ինչ-որ մեկը գաղտնի բոլորի աչքից հեռու ինչ-որ մի բան է անում, մենք էլ տեղյակ չենք: Բոլորս տեղյակ ենք գործիքներին, գործիքակազմին, մասնագիտական քայլերին, հերթականությանը: Այնպես որ չեմ կարող ասել՝ այս մի երկրում ավելի լավ էր, քան այն մի երկրում: Ով որ ավելի շատ ֆինանսական միջոցներ ունի և հատկացնում է բնակչության առողջության պահպանմանը, բնականաբար, այդ երկրներում որոշակիորեն ավելի շատ հաջողություններ կլինեն»:
Ինչ վերաբերում է Ռոբերտ Քոչարյանի իշխանության վերադառնալու ցանկությանը, Արարատ Մկրտչյանն ասաց. «Ես քաղաքականությամբ չեմ զբաղվում, քաղաքական խնդիրներին որակումներ տալու ցանկություն չունեմ և երբեք նպատակ չեմ ունեցել: Աշխատել եմ մասնագիտական հարթության մեջ լինել: Իսկ փոփոխությունները հասարակության մեջ անկախ մեր կամքից տեղի են ունենալու: Այնպես չէ՝, որ կյանքը կանգնած է»: Նա հավելեց, որ այսօր քաղաքական ողջ ներկապնակը հիմնված է նախկինների վրա, նորը չենք տեսնում, դժբախտաբար:
