ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանն ամփոփեց 5-ամսյա գործունեությունը:
Մասնավորապես, նա հայտնեց, որ աշխատանքային այցով եղել է մարզերում գործող մարզադպրոցներում և ի մի է բերել դպրոցներում առկա խնդիրները: Հաջորդ տարվա համար նախարարությունն ունի 500 միլիոն դրամ գույքային ծրագրի համար:
«Հայաստանի կառավարությունը նախարարության միջոցով 40 միլիոն դրամ է տրամադրել մարզիկներին` դեղերի և վիտամինների համար: Հայաստանում գործող 15 ֆեդերացիա դրանից գումար է ստացել: Երբևէ նման կարգի գումար չի տրամադրվել»,- լրագրողների հետ հանդիպմանն ասաց Գիլոյանը: «Համահավասարեցման կոչ ենք արել, որ բոլոր մարզադպրոցների մարզիչները ստանան հավասար աշխատավարձ: ՊՈԱԿ-ների մարզիչները 2022 թվականից կունենան սոցփաթեթներ»,-ասաց նա:
Գիլոյանը շեշտեց, որ հայկական սպորտի զարգացմանը կծառայի նաև այն որոշումը, որ նախագահի կողմից քաղաքացիություն ստացած մարզիկները կազատվեն զինվորական ծառայությունից:
Հայաստանում կլինի բարձրագույն վարպետության դպրոցը, որտեղ օրինական գրանցում կունենան մարզիկները և մարզիչները, որոնք օրինական ճանապարհով աշխատավարձ կստանան:
«Իմ խորին համոզմամբ, Հայաստանը պարբերաբար պետք է դառնա շատ լուրջ մարզական իրադարձությունների կենտրոն: Մենք դուրս ենք մնացել աշխարհի սպորտային քարտեզից: Երբ կանցկացնենք բարձրակարգ մարզական միջոցառումներ` մարզիկներ կգան, կճանաչեն Հայաստանը և կզարգանա նաև տուրիզմը: Հայաստանում առաջիկայում կանցկացվի բոդիբիլդինգի պրո կարգի մրցաշարը»,-ասաց նա: Մեծ աշխատանք է տարվում նաև մի քանի տարի անց Հայաստանում ծանրամարտի Եվրոպայի կամ աշխարհի առաջնություն անցկացնելու հարցի շուրջ:
Միջազգային համագործակցության արդյունքում Ռուսաստանի ծանրամարտի օլիմպիական թիմը ուսումնամարզական հավաք կանցկացնի Ծաղկաձորում:
