Հեռուստատեսության և ռադիոյի հանձնաժողովն այսօրվա իր նիստում սահմանել է խորհրդարանական արտահերթ ընտրությունների նախընտրական քարոզչության ժամանակահատվածի վճարովի եթերաժամի մեկ րոպեի գինը: Ըստ այդմ, վճարովի եթերաժամի մեկ րոպեի գինը հանրային ռադիոյի համար 1800 դրամ (ներառյալ՝ ԱԱՀ-ն) իսկ հանրային հեռուստատեսության համար՝ 45 000 դրամ: Այդ գները զգալիորեն ցածր են նախկին տարիների ընտրություններում սահմանված սակագներից:
Ինչո՞վ է սա պայմանավորված և ընդհանուր առմամբ, սա որքանով կարող է փոխել քաղաքական ուժերի միջև մրցակցային հնարավորությունները, որքանով այն կարող է ավելի բարենպաստ միջավայր ապահովել քաղաքական ուժերի համար: Այս խնդիրների շուրջ «Առաջին լրատվական»-ը զրուցել է Խոսքի ազատության պաշտպանության կոմիտեի ղեկավար Աշոտ Մելիքյանի հետ:
«Դեռ նախքան հեղափոխությունը եղած ընտրությունների ժամանակ մենք միշտ ասում էինք, որ սահմանվող գները չափազանց բարձր են և դա արվում էր միտումնավոր, որպեսզի փոքր կուսակցությունները կամ ընտրապայքարի մեջ նոր մտնող ուժերը մեծ հնարավորություններ չունենան մասնավոր հեռուստաընկերությունների միջոցով իրենց նախընտրական ծրագրերը, դիրքորոշումներն արտահայտելու հնարավորություն, և դա մեծ հաշվով, դառնում էր խոչընդոտ: Ըստ էության, եթերաժամանակից ավելի շատ կարողանում էին օգտվել այն քաղաքական ուժերը, որոնք ունեին այդ հնարավորությունները: Մենք շատ լավ հասկանում էինք, որ բիզնեսը սերտաճած է իշխանության հետ և մեծ հաշվով իշխանամետ ուժերը, որոնք հետո կոալիցիա էին կազմում կառավարությունում, դա լուրջ քաղաքական հետևանքներ էր ունենում:
Իսկ փոքր կուսակցությունները շատ հազվադեպ էին հանդես գալիս այդ հարթակներում, ինչն արձանագրվել է բազմաթիվ մոնիտորինգներով: Այն, ինչ հիմա կատարվում է, պայմաններ է ստեղծում մրցակցային ընտրություններ անցկացնելու համար, որովհետև փաստորեն մի քանի անգամ գներն իջել են, հետևաբար նույնիսկ փոքր կուսակցությունները, որոնք իրենց շարքերում չունեն մեծահարուստներ, շատ չեն տուժի: Ես հույս ունեմ, որ սա կնպաստի, որ քաղաքական ուժերը հնարավորություն ունենան իրենց դիրքորոշումները, մոտեցումները արտահայտելու, որպեսզի հասարակությունը տեղեկացված լինի»,-ասաց փորձագետը:
Դիտարկմանը, որ հայաստանյան հիմնական հեռուստաընկերությունները կուսակցականացված են, դա հաշվի առնելով որքանո՞վ կարող ենք ակնկալել բարեխիղճ մոտեցում հեռուստաալիքների կողմից, Աշոտ Մելիքյանն արձագանքեց. «Իսկապես մենք հիմա ունենք բազմակուսակցական եթեր, բայց քանի որ ըստ ընտրական օրենսգրքի բոլոր հեռուստաընկերությունները պետք է հրապարակեն իրենց գովազդային շրջանակները, նրանք պարտավոր են լինելու ցույց տալ, որ կատարում են այդ պահանջը: Այսինքն այն քաղաքական ուժերը, որոնք կվճարեն այդ գումարը, նրանք անարգել պետք է ստանան իրենց եթերը: Եթե հանկարծ դա չապահովվի, ապա քաղաքական ուժը հնարավորություն է ունենալու ԿԸՀ և հեռուստաընկերության արածը կդիտվի խախտում: Հեռուստատեսության և ռադիոյի հանձնաժողովը պետք է հետևի այդ գործընթացին և կարծում եմ՝ սա այն դեպքն է, որ ամենայն հավանականությամբ հեռուստաընկերությունները չեն խախտի օրենքի պահանջը, որովհետև դա լուրջ հետևանքներ կարող է ունենալ: Մի քիչ այլ կարգավիճակում է լինելու Հանրային հեռուստատեսությունը այն առումով, որ այն լինելով հանրային ռեսուրսը, պարտադրված է նաև անվճար եթեր տրամադրել քաղաքական ուժերին: Կարծում եմ՝ բոլոր քաղաքական ուժերը դրանից կօգտվեն»:
ԽԱՊԿ ղեկավարի խոսքով, նախկինում փոքր կուսակցություններն անվճար եթերից օգտվում էին, իսկ վճարովիից ձեռնպահ էին մնում, քանի որ վճարը բավականին բարձր էր՝ մեկ րոպեն 100 հազար դրամի կարգի. «Այս առումով այս անգամ իրավիճակը շատ ավելի բարենպաստ է լինելու, քան նախորդ տասնամյակներում էր»: