Հայաստանի վարչապետի պաշտոնակատար Նիկոլ Փաշինյանը հեռախոսազրույց է ունեցել ԱՄՆ նախագահի ազգային անվտանգության հարցերի խորհրդական Ջեկ Սալիվանի հետ, որի ընթացքում քննարկվել է սահմանային իրավիճակը, որը ստեղծվել է ադրբեջանական սադրանքի հետևանքով: Ըստ Երևանի տարածած պաշտոնական հաղորդագրության, ԱՄՆ բարձրաստիճան դիվանագետը անընդունելի է համարել Ադրբեջանի գործողությունը և հայտնել, որ Ադրբեջանը պետք է հետ քաշի իր ստորաբաժանումները: Ըստ հաղորդագրության, Ջեկ Սալիվանը հայտնել է, որ ԱՄՆ-ը փոխանցելու է այդ դիրքորոշումը Բաքվին:
Վաշինգտոնը փաստորեն ավելի է հստակեցնում իր դիրքորոշումը Հայաստանի սահմանին ստեղծված իրավիճակի առնչությամբ և ունենք մի պատկեր, երբ Մինսկի խմբի երեք համանախագահներից, և ՄԱԿ անվտանգության խորհրդի հինգ մշտական անդամներից երկուսը հստակ դիրքորոշումով պահանջում են ադրբեջանական զինուժի հետքաշում, այն դեպքում, երբ Հայաստանի ռազմա-քաղաքական դաշնակցային բլոկ ՀԱՊԿ-ը դեռ լռում է, իսկ ռազմավարական դաշնակից Ռուսաստանի արտաքին գործերի նախարարը ավելորդ հույզեր է որակում այն անհանգստություններն ու աղմուկը, որ բարձրաձայնում է Հայաստանը: Ի՞նչ է դա նշանակում, որ ամեն ինչ Ռուսաստանի վերահսկողության ներքո՞ է, եթե Երևանի անհանգստությունն ավելորդ հույզեր են: Այդ դեպքում ինչու են ադրբեջանցիներն արդեն օրեր շարունակ գտնվում Հայաստանի ինքնիշխան տարածքում և չեն հեռանում: Թե՞ Մոսկվան փորձում է պարզապես թույլ չտալ, որպեսզի հարցի լուծման գործընթացում ներգրավվեն ԱՄՆ-ը ու Ֆրանսիան, առավել ևս ՄԱԿ անվտանգության խորհուրդը, որտեղ Ռուսաստանը ստիպված կլինի կամ գործել Հայաստանի շահին համահունչ, կամ պարզապես հրապարակավ դուրս գալ այդ շահին և վետո կիրառել՝ «ավելորդ հույզերի» մեկնաբանությամբ: Այդ իմաստով թերևս հետաքրքիր է, թե արդյո՞ք Նիկոլ Փաշինյանի և Սալիվանի հեռախոսազրույցում քննարկվել է ստեղծված իրավիճակի և ընդհանրապես ռեգիոնալ նոր իրադրությունում Հայաստանի սահմանների անձեռնմխելիության հարցը ՄԱԿ ԱԽ շրջանակում քննարկելու հնարավորությունը, ինչի մասին առաջարկել էր նաև Ֆրանսիայի նախագահ Էմանուել Մակրոնը: Ընդ որում, գուցե հետաքրքրության է արժանի այն, որ ԱՄՆ նախագահի ազգային անվտանգության հարցերի խորհրդականը՝ որն ըստ էության ԱԽ քարտուղարի պաշտոնն է Նահանգների կառավարության կառուցվածքում, գործընթացին ներգրավվում է ԱՄՆ պետքարտուղար Բլինքենի և Ֆրանսիայի արտգործնախարար Լե Դրիանի զրույցից հետո, որից առաջ ֆրանսիացի նախարարը խոսել էր նաև Հայաստանի արտգործնախարարի հետ: