Հայաստանը Զանգեզուրի միջանցքի հարց չի քննարկել ու չի քննարկելու, ԱԽ նիստում հայտարարել է վարչապետի պաշտոնակատար Նիկոլ Փաշինյանը, նշելով, որ Հայաստանը կողմ է և քննարկում է հաղորդուղիների ապաշրջափակման օրակարգը, բայց այսպես կոչված միջանցքի հարց չի քննարկել ու չի քննարկելու: Նիկոլ Փաշինյանն ԱԽ նիստում հայտարարել է, որ Հայաստանի պահանջը շարունակում է մնալ նույնը՝ Ադրբեջանը պետք է հեռանա Հայաստանի ինքնիշխան տարածքից: Հատկանշական է այն, որ ԱԽ նիստից հետո Նիկոլ Փաշինյանը ֆեյսբուքյան գրառում է արել այն մասին, որ նկատվում է սահմանային որոշակի հատվածներում լարվածության աճի միտում և ադրբեջանական կողմի աշխուժացման նշաններ: Արդյո՞ք դրանք պայմանավորված են ԱԽ նիստում Նիկոլ Փաշինյանի արած հայտարարության հետ, որ Հայաստանը չի քննարկել ու չի քննարկելու միջանցքի հարց:
Նիկոլ Փաշինյանը ֆեյսբուքյան գրառումով միաժամանակ հայտնել է, որ Հայաստանը աշխուժացնում է ՀԱՊԿ մեխանիզմի և հայ-ռուսական ռազմական փոխօգնությամբ համակարգի գործարկումը: Այդպիսով, նախօրեին տեղի ունեցած բանակցությունից հետո մամուլ սպրդած տեղեկությունները այն մասին, որ ձեռք է բերվել դրական արդյունք և ադրբեջանցիները հետ կքաշվեն ելման դիրք, պաշտոնապես գոնե այս պահին չի հաստատվում և հակառակը՝ վարչապետի պաշտոնակատար Նիկոլ Փաշինյանն արձանագրում է, որ իրավիճակը առավոտյան ստացել է որոշակի լարվածության աճի միտում: Ի՞նչ է կատարվել գիշերը, որ բանակցային դրական ազդակները վերածվել են լարվածության աճի միտման, թե՞ այդ ազդակներն էին այսպես ասած կեղծ և ուղղված էին որոշակի զգոնություն բթացնելուն: Հարցերը իրապես շատ են: Միաժամանակ հարկ է նկատել, որ դրական ազդակներից զատ, բանակցային իրավիճակի առնչությամբ եղան նաև այնպիսի արտահոսքեր, որոնք վերաբերում էին իբրև թե ադրբեջանական պայմաններին և դրանց բավարարմանը՝ Իշխանասարում ռազմական հենակետեր ունենալու և յուրաքանչյուրում 60 զինվոր պահելու, կամ այսպես կոչված Քյարքիի անկլավը պահանջելու վերաբերյալ: Այդ տեղեկությունները տարածում էին նախկին կառավարող համակարգը ներկայացնող ուժերը, մասնավորապես Ռոբերտ Քոչարյանի գլխավորած դաշինքի, ԲՀԿ ներկայացուցիչները:
Նիկոլ Փաշինյանն ԱԽ նիստում անդրադարձել է այդ իրողությանը, այն ուղիղ գնահատելով ադրբեջանական քարոզչության տեղական պրոյեկտում: Նիկոլ Փաշինյանի անդրադարձը զուտ քարոզչական-քաղաքական դաշտում է՝ պատասխան իշխանության դեմ հարձակումներին, թե՞ ակնարկ, որ այդօրինակ արտահոսքերը խանգարել են բանակցային արդյունքի իրացմանը: Հարցերն այստեղ իսկապես շատ են, որոնց թվում և այն, որ ազդարարվել է մայիսի 19-ին բանակցությունը շարունակելու մասին: Հարց է առաջանում, ինչու ոչ այսօր կամ վաղը, ինչի համար է երկօրյա դադարը, ո՞ւմ համար, ո՞վ է այն խնդրել՝ Ադրբեջանը, Հայաստանը, թե՞ Ռուսաստանը: Միևնույն ժամանակ, Նիկոլ Փաշինյանը հայտարարել է, որ Հայաստանը մերժում է սահմանային հարցերը երկկողմ ձևաչափով կարգավորելու Ադրբեջանի մոտեցումը, որ բարձրաձայնել էր Բաքուն: Երևանի փաստարկն այն է, որ չկա-հայ-ադրբեջանական այնպիսի հարաբերություն, որը թույլ կտա մտածել երկկողմ քննարկումների մասին: Միաժամանակ, Նիկոլ Փաշինյանը նշել է եռակողմ ձևաչափի մասին: Այստեղ առաջանում է մեկ այլ հարց՝ իսկ Երևանը քննարկե՞լ է բազմակողմը, մասնավորապես Ֆրանսիայի առաջարկի՝ ՄԱԿ ԱԽ համատեքստում: Թե՞ Հայաստանն ու Ֆրանսիան այդ համատեքստում դիտարկում են այդ հանգամանքը եռակողմ ձևաչափում Հայաստանի դիրքերն ամրացնելու տրամաբանության մեջ, գոնե այս փուլում: