Արդեն ուրվագծվում է, թե որ քաղաքական ուժերն են մասնակցելու առաջիկա արտահերթ ընտրություններին: Առաջին անգամ է, որ ընտրություններին մասնակցելու հայտ են ներկայացրել բոլոր նախկին նախագահներն ու գործող վարչապետը: Այս լարված իրավիճակով որքանո՞վ հնարավոր կլինի ավարտին հասցնել նախընտրական գործընթացը և կազմակերպել ընտրություններ, արդյոք հնարավոր է, որ չեղարկվեն ընտրությունները: Այս խնդիրների շուրջ «Առաջին լրատվական»-ը զրուցել է Ձայն լիբերթար պահպանողական կուսակցության կառավարման խորհրդի անդամ Արեգ Քոչինյանի հետ:
«Ես որքան հասկանում եմ՝ սահմանադրական կարգավորումն այնպիսին է, որ եթե անգամ հիմա իշխանությունները ռազմական դրություն հայտարարեն, դա միայն ժամանակավոր միջոց կլինի, որովհետև այդ ռազմական դրությունն, ի վերջո, կամ պետք է երկարաձգվի, կամ հավելյալ ժամկետ դրան դրվի խորհրդարանի կողմից, իսկ խորհրդարան մենք այս պահին չունենք, այն ցրված է: Այսինքն եթե անգամ իշխանությունները գնան ռազմական դրություն հայտարարելու ճանապարհով, դա կլինի ժամանակավոր միջոց, որն առավելագույնը կհետաձգի ընտրությունների կազմակերպումը: Թեպետ, անկեղծ ասած, չեմ էլ կարծում, թե իշխանությունը դրան կգնան: Երկրորդ, նաև կարծում եմ, որ մենք դեռ չենք տեսել այդ նախընտրական դիրքավորման պրոցեսի ավարտը: կարծում եմ՝ մենք դեռ կտեսնենք կամ նոր դաշինքների կազմավորում, կամ այդ դաշինքների ընդլայնում»,-ասաց նա:
Արեգ Քոչինյանն անդրադառնալով նրան, որ առաջին անգամ ընտրություններին մասնակցելու են Հայաստանի բոլոր 4 ղեկավարները, նաև նոր ուժեր են հայտ ներկայացրել, կարծիք հայտնեց, որ սպասվող արտահերթ ընտրությունների ֆոնին նոր դաշինքների ձևավորման գործընթացը դեռ չի ավարտվել. «Իմ գնահատմամբ, Ռոբերտ Քոչարյանը և Սերժ Սարգսյանը կիսում են նույն կոնտինգենտի ձայները: Այսինքն այդ երկուսին հնարավոր քվեարկողները հիմնականում նույն սոցիալական, կրթական խավի ներկայացուցիչներ են և նրանց ձայներն, այդ առումով, կիսվելու են: Լևոն Տեր-Պետրոսյանը ձայներ է վերցնելու, պայմանական ասած, տանը մնացող ընտրազանգվածից, որը չէր ուզում այս ընտրություններին որևէ կերպ մասնակցել: Եվ վերջապես, պետք է աշխատի նաև աջ ուժերի դաշինքը, որը դեռևս չի ձևավորվել:
Ես հույս ունեմ, որ այս ընտրությունների արդյունքներն անակնկալ կլինեն, որովհետև միայն անակնկալը կկարողանա երկիրն այս ճգնաժամային իրավիճակից դուրս բերել և չունենալ ավելի վատ խորհրդարան, քան գործողն է»:
Հարցին, թե գործող իշխանական թիմն ունի՞ վերընտրվելու շանս, քաղաքագետը պատասխանեց. «Ես հիմա կդժվարանամ այդ հարցին պատասխանել, որովհետև, ինչպես ասացի, նախընտրական գործընթացները դեռ իրենց տրամաբանական ավարտին չեն հասել: Երբ մենք մուտք կգործենք ընտրապայքարի փուլ, այդ ժամանակ հնարավոր կլինի որևէ կանխատեսում անել»:
Ինչ վերաբերում է նրան, թե Սյունիքում ստեղծված իրավիճակը, առկա տագնապները որքանով են ազդում և ազդելու ընտրական գործընթացների վրա, Արեգ Քոչինյանն ասաց. «Ինքնին հասկանալի է, որ այդ իրավիճակն ազդում է ներքաղաքական ու ընտրական գործընթացների վրա: Այլ բան, որ դաշտի տարբեր խաղացողներ փորձում են դա օգտագործել, իշխանությունները փորձում են իրենց ներկայացնել որպես իրավիճակին տիրապետող, Հայաստանի ինքնիշխանությունն ու տարածքային ամբողջականությունը մաքսիմալ պաշտպանող: Ընդդիմության որոշ հատվածներ փորձում են կորուստներն ու վտանգները ավելի մեծ ներկայացնել, քան դրանք իրականում կան: Ընդհանրապես, երբ մենք մուտք ենք գործում նախընտրական տրամաբանության մեջ, բնական ու հասկանալի է, որ բոլոր խաղացողները ցանկացած նման մասշտաբի գործընթաց այսպես թե այնպես օգտագործելու են»:
