Չեխիայի իշխանությունները ցուցադրում են Վրբետիցայի զինապահեստում պայթյունի օբյեկտիվ հետաքննություն անցկացնելու անկարողություն և նախընտրում են մեղքը բարդել «արտաքին թշնամու» վրա՝ ի դեմս Ռուսաստանի: Այս մասին ասվում է շաբաթ օրը ՌԴ ԱԳՆ պաշտոնական ներկայացուցիչ Մարիա Զախարովայի հաղորդագրության մեջ:
Դիվանագետն ուշադրություն է հրավիրել չեխական «Mlada fronta Dnes» թերթում մայիսի 14-ին հրապարակված հոդվածի վրա, որը վերաբերում է 2014 թվականին Վրբետիցայի զինապահեստում պայթյունից հետո մեծ քանակությամբ զենքի անհետանալուն:
«Այս անգամ, ըստ պարբերականի հաղորդման, մեկնաբանությունից հրաժարվում են Չեխիայի պետական քննչական մարմինները և հանցավորության դեմ պայքարի ազգային կենտրոնը»,-նշել է Զախարովան:
Ըստ նրա՝ տպավորություն է ստեղծվում, որ Չեխիայի իշխանությունները ոչ միայն ունակ չեն կատարել օբյեկտիվ հետաքննություն, այլև չեն կարողանում կազմել իրադարձությունների տրամաբանական շղթան: