Անդրադառնալով ղարաբաղյան խնդրի կարգավորման հեռանկարներին` Ադրբեջանի նախագահի աշխատակազմի արտաքին կապերի բաժնի պետ Նովրուզ Մամեդովը «Ենի Ազերբայջան» կուսակցության պաշտոնական կայքին տված հարցազրույցում նշել է. «Մեր նպատակն է հասնել ԼՂ խնդրի կարգավորմանը բանակցությունների ճանապարհով` երկրի տարածքային ամբողջականության շրջանակներում»,- հայտնում է Trend գործակալությունը:
«Աշխարհում գոյություն ունի «միջազգային իրավունք» հասկացությունը, որի հիման վրա պետք է կարգավորվեն հակամարտությունները: Այսօր միջազգային հանրությունը ընդունում եւ աջակցում է Ադրբեջանի դիրքորոշմանը: Դրա վառ ապացույցն էր ՆԱՏՕ-ի 28 անդամ պետությունների կողմից ընդունված փաստաթուղթը, որը պաշտպանում է Ադրբեջանի տարածքային ամբողջականությունը»: Ն.Մամեդովը նշել է, որ ԵԱՀԿ-ն այժմ ակտիվություն է ցուցաբերում ԼՂ կարգավորման գործընթացում. «Այսօր միջազգային հանրությունը պաշտպանում է ԼՂ խնդրի կարգավորումը Ադրբեջանի տարածքային ամբողջականության շրջանակներում, սակայն Հայաստանի ղեկավարությունը խոչընդոտում է կարգավորմանը»:
Ն.Մամեդովի մատուցմամբ` Աստանայում կայանալիք ԵԱՀԿ գագաթնաժողովը նույնպես պետք է արտահայտի կոնկրետ մոտեցում ԼՂ հարցում. «Եվրոպայում անվտանգության եւ համագործակցության կազմակերպություն» անվանման մեջ «անվտանգություն» բառը վերաբերում է հենց Հարավային Կովկասին: Սակայն, ցավոք, իմ կարծիքով, ԼՂ խնդրի կարգավորման միջնորդի դերը փոխանցելով համանախագահներին` վճռական դիրքորոշում չի ցուցաբերում: Այս հզոր կազմակերպությունը պետք է լուրջ միջոցներ ձեռնարկի Հարավային Կովկասի անվտանգության ապահովման ուղղությամբ, ընդունի համապատասխան փաստաթղթեր եւ մեծացնի ճնշումը Հայաստանի վրա»,- հայտարարել է Մամեդովը:
Ի դեպ, Նովրուզ Մամեդովը նշել է, որ Սերժ Սարգսյանը դիտարկում է ԵԱՀԿ գագաթնաժողովին չմասնակցելու հնարավորությունը. «Բայց ես կարծում եմ, որ ամեն դեպքում նա կմասնակցի գագաթնաժողովին, քանի որ մասնակցությունից հրաժարվելը երկրորդ` աշխարհաքաղաքական նշանակություն ունեցող գագաթնաժողովից, իսկապես կրախ կդառնա Հայաստանի նախագահի եւ այդ երկրի դիվանագիտության համար: Կարծում եմ` Հայաստանի նախագահը պարտավոր է մասնակցել Աստանայի գագաթնաժողովին: Ընդհանուր առմամբ դա կապված է այն բանի հետ, որ Հայաստանի ղեկավարությունը իր անհիմն եւ ապակառուցողական դիրքորոշմամբ իրեն ծանր վիճակի մեջ է դրել: Իսկապես, այսօր Հայաստանի ղեկավարությունը երկիրը քաղաքական եւ դիվանագիտական փակուղի է մտցրել»,-ասել է Ն.Մամեդովը: