Երբ ես և իմ գործընկերները նոյեմբերի 9-ից հետո բարձրաձայնում էինք, որ ձնհալից հետո ադրբեջանցիներն անպայման փորձելու են նոր բարձունքներ վերցնել, այնքան էիք խորացել քաղաքական դավադրության մեջ, որ մեր խմբակցությանը մեղադրում էինք նրանում, որ մենք չենք ուզում Սյունիքն ու Գեղարքունիքն անվտանգ լինեն: ԱԺ-ում ելույթի ժամանակ ասաց «Բարգավաճ Հայաստան» խմբակցության պատգամավոր Շաքե Իսայանը՝ դիմելով «Իմ քայլին»:
Պատգամավորն արձանագրեց, որ հրադադարի համաձայնագրից հետո հայկական կողմը կրկին ունեցավ տարածքային կորուստներ և գերիներ.
«Պատերազմից հետո հրապարակեցիք ճանապարհային քարտեզ, որով ժողովրդից վեց ամիս ժամանակ էիք խնդրում, որպեսզի իրավիճակը կայունացնենք, բայց ինչպես տեսնում ենք, ճգնաժամն ավելի է խորանում: Այդ ճանապարհային քարտեզով խոստանում էիք լուծել գերիների հարցը ու ԼՂ կարգավիճակի հարցով Ադրբեջանին բերել բանակցային սեղան, բայց վեց ամսում միակ բանը, որ արել եք, Հայաստանի համար անվտանգային նորանոր մարտահրավերներ ստեղծելն էր»,-ասաց Շաքե Իսայանը:
