Ունենք ագրեսոր հարևան, նրան ամբողջությամբ սատարող էլ ավելի ագրեսոր Թուրքիա, որոնց նպատակը Հայաստանից մեկ-երկու կմ վերցնելը չէ, այլ՝ հայ ժողովրդին բնաջնջելն է, հայոց պետականության վերացումն է, ինչը թույլ չենք տալու։ Այս մասին ԱԺ-ում ասաց «Լուսավոր Հայաստան» խմբակցության պատգամավոր Գևորգ Գորգիսյանը։
«Հանրությունն ունի դժգոհելու իրավունք, որովհետև երբ տան տանիքը կաթում է, երեխաները կարող են բողոքել, թե ինչու հայրը ժամանակին չի կառուցել այդ տանիքը, ինչու ենք սպասել ձմեռը գա և չենք նորոգել ամռանը։ Կարևոր է, որ հանդուրժող լինենք, որովհետև չենք կարող խոսել միասնականությունից և տեղից բղավելով վիրավորել միմյանց։ Իշխանության կրողը, մեծ ուժեղը պետք է ավելի հանդուրժող լինի, պետք է ցույց տա իր լայնախոհությունը, հանդուրժողականությունը։ Այսօր կարևոր է, որ լինենք միասին և մատնանշենք, ողջ աշխարհին ցույց տանք, թե ինչ է կատարվում տարածաշրջանում»,- նշեց նա։
