Իսրայելի ռազմաօդային ուժերը ավիահարվածներ են հասցրել Գազա քաղաքի Ռիմալ շրջանում գտնվող վեցհարկանի բնակելի շենքի վրա, որն ավերվել է, հինգշաբթի հաղորդում է պաղեստինյան Wafa լրատվական գործակալությունը:
«Իսրայելի ռազմաօդային ուժերի F-16 ինքնաթիռը երկու հրթիռներով հարձակվել է Գազայի Ռիմալ շրջանում գտնվող «Աթ Թուրք» բնակելի վեցհարկանի շենքի վրա՝ այն վերածելով աղյուսների կույտի»,- նշում է գործակալությունը:
Նրա խոսքով՝ մոտակայքում գտնվող շենքերը նույնպես «զգալիորեն վնասվել են»:
Այս բարձրահարկ շենքը դարձել է չորրորդը Գազայի հատվածում, որը երեքշաբթի օրվանից ավերվել է Իսրայելի ռազմաօդային ուժերի կողմից:
«Որոշ ժամանակ առաջ Իսրայելի Պաշտպանության ուժերի ինքնաթիռները հարձակվեցին Ռամալ շրջանում գտնվող «Համասի» հետախուզական ստորաբաժանումների վրա», – հայտնել է իսրայելական բանակի մամուլի ծառայությունը:
Նշվում է, որ նախքան հարվածելը զինծառայողները նախազգուշացրել են «շենքում գտնվող քաղաքացիական անձանց և նրանց ժամանակ են տվել տարհանվելու համար»:
