Թուրքիան կրկին դիմել է ԱՄՆ-ին՝ կոչ անելով բանակցություններ վարել ռուսական C-400 զենիթահրթիռային համակարգերի շուրջ խնդրահարույց հարցերի և F-35 կործանիչների արտադրության ծրագրից Թուրքային հեռացնելու վերաբերյալ: Այդ մասին հայտարարել է Թուրքիայի նախագահի պաշտոնական ներկայացուցիչ Իբրահիմ Քալընը։
«Մենք կրկնում ենք ԱՄՆ-ի համար առաջարկը՝ քննարկել C-400-ների, F-35-ի և CAATSA-ի թեմաները («Պատժամիջոցների միջոցով Ամերիկայի հակառակորդներին հակազդելու մասին օրենք»): Մենք կարող ենք այդ հարցերը լուծել բանակցությունների միջոցով, եթե ռազմավարական դաշնակիցներ և գործընկերներ ենք: Մենք ակնկալում ենք, որ սխալները կուղղվեն»,-Hurriyet թերթին ասել է Քալընը:
Ըստ նրա՝ Թուրքիային չեն գոհացնում «ԱՄՆ-ի այն պնդումները, որ C-400-ը վտանգ է ներկայացնում ՆԱՏՕ-ի, ինչպես նաև F-35 ինքնաթիռների անվտանգության համար»:
«Եթե պայմաններն ընդունելի լինեն, մենք C-400-ից բացի կգնենք նաև ամերիկյան «Patriot» համակարգեր, սակայն հարկադրված ենք հաշվի առնել ազգային շահերը: Եվ դա չի նշանակում, որ համագործակցությանն այլընտրանք չի մնում»,-ասել է թուրք պաշտոնյան՝ հիշեցնելով, որ Թուրքիայի նախագահի աշխատակազմը շարունակում է պատրաստվել Էրդողան-Բայդեն հանդիպմանը, որը նախատեսված է ՆԱՏՕ-ի հունիսյան գագաթնաժողովին:
