Երևան քաղաքի առաջին ատյանի ընդհանուր իրավասության դատարանի դատավոր Կարինե Պետրոսյանը հրաժարականի դիմում է ներկայացրել Բարձրագույն դատական խորհրդին։ Այս մաիսն տեղեկացրել է ինքը՝ դատավորը իր ֆեյսբուքյան էջի միջոցով։ «Ամիսներ շարունակ տևած գործընթացները իմ նկատմամբ հարուցված կարգապահական վարույթի և քրեական գործի շրջանակներում վերհանեցին դատական իշխանության կրողի առջև ծառացած այն խնդիրը, որ դատավորը միայնակ է դիմակայում ճնշումներին ու մարտահրավերներին, որովհետև մեկ ձայնի ստորագրությամբ, մեկ «անձ»-ի քվեարկությամբ ԲԴԽ-ն դատավորների անկախությունը երաշխավորող մարմնից վերածվել է օրենսդիր մարմնի արդեն նախկին իշխող ուժի տեղական նշանակության օղակի, դատավորներին պատժող ու զսպող կառույցի, որի «ղեկը» տրվել է սահմանադրական օրենքի պահանջների խախտմամբ ընտրված, տարիքը լրանալու հիմքով լիազորությունները վաղուց դադարած անձի»,-գրել է Պետրոսյանը։
Հիշեցնենք, որ Կարինե Պետրոսյանն այս տարվա փետրվարի 24-ին հայցադիմում էր ներկայացրել դատարան՝ ԲԴԽ նախագահի ներկայիս պաշտոնակատար, ԲԴԽ իրավաբան գիտնական անդամ Գագիկ Ջհանգիրյանի լիազորությունները դադարեցնելու պահանջով։ Պետրոսյանը պնդում էր, որ Գագիկ Ջհանգիրյանի 65 տարին լրացել է և նա չէր կարող ԲԴԽ անդամ ընտրվել։
Կարինե Պետրոսյանը պահանջում էր դատարանից՝ պարտավորեցնել ԲԴԽ նախագահ Ռուբեն Վարդազարյանին՝ դատական իշխանության պաշտոնական կայքում հրապարակել Գագիկ Ջհանգիրյանի լիազորությունները դադաերլու վերաբերյալ հայտարարություն։ Պետրոսյանը մեզ հետ զրույցւոմ նշել էր, որ դատարանի կոմղից իր հայցի մերժման պարագայում պատրաստ է գնալ մինչև վերջ՝ ընդհուպ Սահմանադրական դատարան։
Հիշեցնենք նաև, որ այս տարվա հունվարի 27-ին Արդարադատության նախարարի որոշմամբ կարգապահական վարույթ էր հարուցվել Կարինե Պետրոսյանի նկատմամբ։ Դատավորը գտնում էր, որ ԲԴԽ գործող կազմի պարագայում կխախտվի իր դեմ հարուցված կարգապահական գործի արդար քննությունը։
Բացի դա Հատուկ քննչական ծառայությունը դեռևս անցյալ տարի քրեական գործ էր հարուցել ՀՀ քրեական օրենսգրքի 308 հոդվածով՝ Կարինե Պետրոսյանի կողմից խախտում կատարելու առթիվ: Դատավոր Կարինե Պետրոսյանը բողոքարկել էր ՀՔԾ-ի որոշումը դատարանում։
«Առաջին լրատվական»-ը փորձեց մեկնաբանութուն ստանալ դատավորին, թե ինչու է որոշել հրաժարվել դատավորի պաշտոնից։ Պետրոսյանը, սակայն, ողջ օրվա ընթացքում չպատասխանեց մեր զանգերին։
ԲԴԽ անդամ Գրիգոր Բեքմեզյանն «Առաջին լրատվական»-ի հետ զրույցում ասաց, որ ստացել են դատավորի դիմումը, օրակարգում ընդգրկված է հարցը և առաջիկայում կքննարկեն։ Ինչ վերաբերում է դատավորի կողմից ԲԴԽ-ի հասցեին հնչող քննադատությանը, ապա Բեքմեզյանն ասաց, որ դատավորն իրավունք ունի կարծիք հայտնելու, բայց դա չի նշանակում, որ ինքը համաձայն է դրա հետ.«Դատավորը կարծիք է հայտնել, դրա իրավունքը ունի, բայց ես դրա հետ համակարծիք չեմ։ Այլ կերպ չեմ ցանկանում անդրադառնալ այդ հայտարարությանը»,-ասաց Բեքմեզյանը։