Իսրայելական Լոդ քաղաքում արտակարգ դրություն է հայտարարվել։ Զգալի արաբ բնակչություն ունեցող քաղաքում գիշերը զանգվածային անկարգություններ են տեղի ունեցել։ Կառավարությունը քաղաք է ուղարկում սահմանապահ ոստիկանության լրացուցիչ գումարտակներ։ Այս մասին հայտնում է վարչապետի գրասենյակը։
Նշվում է, իրավիճակը քաղաքում դարձել է վարչապետ Բենյամին Նեթանյահուի նախագահությամբ հատուկ հանդիպման քննակման թեմա։ Հանդիպմանը մասնակցել են ոստիկանության ղեկավարությունը, բարձրաստիճան ուժայիններ, պաշտպանության և ներքին անվտանգության նախարարները։
Երեքշաբթի Իսրայելում վերսկսվել էին անկարգություններն Արևելյան Երուսաղեմի Շեյխ Ջարահ շրջանում, որտեղ արաբական մի քանի ընտանիքներ ստացել էին իսրայելական իշխանությունների կողմից վտարման հրաման։ Ոստիկանությունը հատուկ միջոցներ էր կիրառել բազմությունը ցրելու համար։ Տաճարի լեռան վրա իսրայելցի ուժայինները ռետինե փամփուշտեր էին ակտիվորեն կիրառել ընդդեմ պաղեստինցիների, ովքեր աղոթքի էին եկել Ալ-Աքսա մզկիթ։ Երկրի արաբական բնակչությամբ քաղաքներում հուզումներ էին սկսվել, առավել մասշտաբային անկարգությունները տեղի են ունեցել Լոդում։
Թել-Ավիվից արևելք ընկած Լոդ քաղաքից տեղեկություններ են ստացվում նաև այն մասին, որ հրթիռակոծության հետևանքով այնտեղ երեխա է մահացել։ Jerusalem Post-ը հայտնում է նաև 40-ամյա մի տղամարդու մահվան մասին։ Times of Jerusalem-ն իր հերթին հայտնում է, որ երեխայի հետ մահացել է մոտ 40 տարեկան մի կին, ևս մեկ մարդ վիրավորվել է։
