Ի պատասխան Ռումինիայից իր դիվանագետի վտարմանը՝ Ռուսաստանը Մոսկվայում Ռումինիայի դեսպանության պաշտպանության կցորդի օգնականին պերսոնա նոն գրատա է հայտարարել, գրում է «ՌԻԱ Նովոստի» լրատվական գործակալությունը։
«Մայիսի 11-ին Ռումինիայի դեսպան Քրիստիան Իստրատը հրավիրվեց Ռուսաստանի արտաքին գործերի նախարարություն, որտեղ նրան նախարարությունից հանձնեցին մի գրություն, որով Ռումինիայի դեսպանատան պաշտպանության կցորդ, կապիտան Գ. Իլիեսկուն հայտարարվեց պերսոնա նոն գրատա: Նշված անձից պահանջվել է 72 ժամվա ընթացքում լքել Ռուսաստանի Դաշնության տարածքը»,- ասված է ՌԴ ԱԳՆ հայտարարության մեջ:
Ապրիլի վերջին Ռուսաստանի ռազմական կցորդ Ալեքսեյ Գրիշաևին վտարեցին Բուխարեստից: Սմոլենսկայա հրապարակում այս որոշումը անվանվեց անհիմն անբարյացակամ արարք:
Ավելի վաղ Չեխիայի վարչապետ Անդրեյ Բաբիշը եվրոպական երկրներին կոչ էր անում վտարել ռուս դիվանագետներին՝ ի նշան համերաշխության Պրահայի հետ: Մոսկվան դա անվանեց դիվանագիտական ճգնաժամ հրահրելու փորձ:
Ապրիլի կեսերին Չեխիան Ռուսաստանի հատուկ ծառայություններին մեղադրեց Վրբետիցայի ռմբակոծություններում մասնակցություն ունենալու մեջ և երկրից վտարեց Ռուսաստանի դեսպանատան 18 աշխատակիցների: Դրան ի պատասխան՝ Մոսկվան պերսոնա նոն գրատա հայտարարեց Չեխիայի դիվանագիտական ներկայացուցչության 20 աշխատակիցների՝ նշելով, որ պայթյունի մեղադրանքներն անհեթեթ են և անհիմն:
Կրեմլը հայտարարել է, որ Ռուսաստանը չի հանդուրժի «այն, ինչ այժմ արվում է» Չեխիայում և դրան միացած երկրներում, ինչպես նաև նշել է, որ Չեխիայի կողմից Ռուսաստանի վերաբերյալ չհիմնավորված հայտարարությունները ծայրահեղ վնաս են հասցրել երկու պետությունների հարաբերություններին:
