Երկրորդ նախագահ Ռոբերտ Քոչարյանը ներքաղաքական պայքարը «դասակարգում» է երկու շերտի՝ պայքար իշխանությունը հեռացնելու համար, և պայքար իշխանության համար: Խոսելով Լևոն Տեր-Պետրոսյանի և Սերժ Սարգսյանի հետ դաշինքի մասին, որ առաջարկել էր Տեր-Պետրոսյանը, Ռոբերտ Քոչարյանը նշել է, թե ոչ ոք չի խանգարում նրանց պայքարել այս իշխանության դեմ և միասնական ձևաչափը պարտադիր չէ: Այդ մասին երկրորդ նախագահը խոսում է մայիսի 9-ին, լրագրողների հետ ճեպազրույցում՝ հանրահավաքի շրջանակում, որ կազմակերպել էր իր գլխավորած դաշինքի «շնորհանդեսի» համար: Ըստ Ռոբերտ Քոչարյանի, նախկին երկու նախագահները կարող են չպայքարել իշխանության համար, բայց իշխանության դեմ պայքարել՝ պարտավոր են: Փաստորեն, Ռոբերտ Քոչարյանն ակնարկում է, որ Լևոն Տեր-Պետրոսյանն ու Սերժ Սարգսյանը խանգարում են իրեն, և, եթե նրանց նպատակն իրեն խանգարելը չէ, ապա ինքը նրանց չի խանգարում պայքարել Նիկոլ Փաշինյանի դեմ: Միաժամանակ, Ռոբերտ Քոչարյանն ակնարկում է, որ նրանցից չի ակնկալում պայքար իշխանության համար, այսինքն՝ իրեն իշխանության վերադարձնելու համար: Երկրորդ նախագահը փաստորեն ակնարկում է, որ ինքն այդ խնդիրը լուծել ի զորու է և նախկին նախագահների աջակցությունն ակնկալում է Նիկոլ Փաշինյանին հեռացնելու համար:
Ռոբերտ Քոչարյանն ակնհայտորեն զգում է առավելություն Լևոն Տեր-Պետրոսյանի և Սերժ Սարգսյանի նկատմամբ և հենց դա է թերևս պատճառը, որ մերժել է նրանց հետ դաշինքով մասնակցությունը: Միևնույն ժամանակ սակայն, Ռոբերտ Քոչարյանը նույնքան ինքնավստահ չէ Նիկոլ Փաշինյանին հեռացնելու հարցում: Այդ իմաստով, նա փաստացի կամա, թե ակամա խոստովանում է, որ իր պայքարը ներկայումս ավելի շուտ նախկին նախագահների շրջանակում հաղթողի կարգավիճակի համար է և այդ պայքարը գործնականում ոչ թե նոր է սկսվում, այլ մտնում է նոր փուլ, նոր իրողությունների բերումով: Որովհետև Ռոբերտ Քոչարյանն այդ պայքարը սկսել է դեռևս իր նախագահության ավարտից, պաշտոնաթողությունից հետո, և վարել այն Սերժ Սարգսյանի նախագահության տասնամյակի ընթացքում, փորձելով չեզոքացնել Լևոն Տեր-Պետրոսյանին այսպես ասած ընդդիմադիր առաջնորդի կարգավիճակից՝ ինչն ըստ էության հաջողել է, իսկ Սերժ Սարգսյանին՝ իշխանության առաջնորդի կարգավիճակից, ինչը նրա մոտ չի հաջողել: Այժմ Ռոբերտ Քոչարյանը նոր իրավիճակում փորձում է դրանից բխող տրամաբանությամբ պայքարել Սերժ Սարգսյանի դեմ, իսկ Լևոն Տեր-Պետրոսյանը՝ օգտագործել այդ նոր իրավիճակի հանգամանքը քաղաքական գործընթացում դիրքերը վերականգնելու համար, որ կորցրել էր նախորդ տասնամյակում:
Լուսանկարը՝ panorama.am-ի
