Ռուսաստանի Դաշնությունում ՀՀ դեսպանատունը հայտարարություն է տարածել, որում իր մտահոգությունն է հայտնել հյուպատոսական ծառայությունների մատուցման հարցում ի հայտ եկած անցանկալի դեպքերի առնչությամբ․
« Դեսպանատունը պարբերաբար տեղեկություններ է ստանում այն մասին, որ որոշ անձինք փորձում են մոլորեցնել քաղաքացիներին՝ առաջարկելով նրանց դեսպանատան գործունեության հետ կապված, այսպես կոչված, «միջնորդական ծառայություններ»: Որպեսզի այդ խաբեբաների զոհը չդառնաք, խնդրում ենք չվստահել որպես «միջնորդ» ներկայացող անձանց։ Նշենք, որ այդպիսի փորձերի մասին բոլոր տեղեկությունները ներկայացվում են համապատասխան մարմիններին»,- ասված է դեսպանատան ֆեյսբուքյան էջում հրապարակված հայտարարությունում:
Հերթական անգամ ՀՀ դեսպանատունը հիշեցնում է, որ ծառայությունները իրականացվում են բացառապես Մոսկվայի դեսպանատան մասնաճյուղում, Սանկտ Պետերբուրգի գլխավոր հյուպատոսության, Դոնի Ռոստովի, Նովոսիբիրսկի և Սոչիի հյուպատոսական բաժանմունքներում: Բոլոր հասցեներն ու հեռախոսահամարները https://bit.ly/2SvOkKe այս հասցեում են:
ՌԴ այլ շրջաններում կան առանձին հյուպատոսական ընդունելություններ, որոնց մասին նախօրոք տեղեկացվում է ՌԴ ՀՀ դեսպանատան կայքէջում: Նշենք նաև, որ հյուպատոսական ծառայությունների պետական տուրքերի չափը սահմանված է ՀՀ կառավարության կողմից և հրապարակված է ՀՀ ԱԳՆ, ՀՀ-ում ՌԴ դեսպանատան պաշտոնական կայքէջերում: Նշված պետական տուրքերը վերջնական են և չեն ենթադրում այլ վճարումներ:
