Հայաստանի օլիմպիական հավաքականը համալրումներ ունի։ Բուլղարիայի մայրաքաղաք Սոֆիայում ընթացող օլիմպիադայի վարկանիշային մրցաշարում երեկ գերազանց ելույթ ունեցան 60 կգ և 67 կգ քաշային Արմեն Մելիքյանը և Կարսեն Ասլանյանը ։Դուրս գալով եզրափակիչ՝ նրանք նվաճեցին Տոկիոյի 32-րդ ամառային Օլիմպիական խաղերի ուղեգիր:Կիսաեզրափակչում Արմեն Մելիքյանը 5:2 հաշվով հաղթեց Հարավային Կորեայից Հանջաե Չունին և այսօր եզրափակչում կփորձի հաղթել մոլդովացի Վիկտոր Չիոբանուն: Ասլանյանն էլ իր հերթին կիսաեզրափակչում հաղթեց ֆրանսիացի Մամադասա Սիլայից՝ 3:1 և ոսկու համար կգոտեմարտի ուկրաինացի Պավրիզ Նասիբովի հետ:
Հիշեցնենք,որ ավելի վաղ Օլիմպիական ուղեգրերի համար պայքարել էին մեր ազատ ոճային ըմբիշները, որոնք անհաջողության էին մատնվել Տոկիոյում, կունենանք միայն երկու ազատ ոճային ըմբիշ: Սոֆիայի վարկանիշային մրցաշարում Հայաստանի երկու ներկայացուցիչներին չէր հաջողվել դուրս գալ եզրափակիչ: Մասնավորապես մրցագորգ էին դուրս եկել 74 կգ քաշային Արման Անդրիասյանը և 86 կգ քաշային Հովհաննես Մխիթարյանը: Ինչևէ, Հայաստանը մինչ այս ուներ 6 օլիմպիական ուղեգրեր, որոնք նվաճել են մարմնամարզիկ Արթուր Դավթյանը, հունահռոմեական ոճի ըմբիշներ Արթուր Ալեքսանյանը, Կարապետ Չալյանը, ազատ ոճային ըմբիշներ Արսեն Հարությունյանը, Վազգեն Թևանյանը, բռնցքամարտիկ Կորյուն Սողոմոնյանը: Այսօր մեր հավաքականը բաղկացած է արդեն 8 մարզիկներից։ ՀԱՕԿ-ի գլխավոր քարուղար Հրաչյա Ռոստոմյանը օրեր առաջ ասել էր, որ մեր օլիմպիական հավաքականի վերջնական կազմը բաղկացած կլինի մոտավորապես 12-14 մարզիկներից։
Հիմա սպասելիքներ ունենք մեր բռնցքամարտիկներից, որոնք պետք է մասնակցել վարկանիշային մրցաշարերի։ Նշենք, որ 2016 թվականին Ռիոյում կայացած նախորդ օլիմպիական խաղերում Հայաստանի հավաքականը կազմված էր 33 մարզիկներից։Ինչ խոսք, համեստ կազմ ունենալու գլխավոր պատճառը կորոնավիրուսի համավարակն է, որի պատճառով անցյալ տարի հետաձգվեցին թե՛ աշխարհի և Եվրոպայի առաջնությունները, թե՛ վարկանիշային մրցաշարերը։ Ամեն դեպքում, այսօր կարող ենք փաստել, որ մեր Օլիմպիական հավաքականի կազմը 2016 թվականի համեմատ երկու անգամ նվազել է։
Տոկիոյի 32-րդ Օլիմպիական խաղերը կմեկնարկեն հուլիսի 23-ին։