Վերաքննիչ քրեական դատարան միանգամից մի քանի բողոք է մուտք եղել՝ Երեւանի ընդհանուր իրավասության դատարանի ապրիլի 6-ի որոշման դեմ, որով արդարացման հիմքով դադարեցվել է Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գեւորգյանի նկատմամբ ՀՀ քրեական օրենսգրքի 300.1-րդ հոդվածի 1-ին մասով քրեական հետապնդումը, իսկ քրեական գործի վարույթը կարճվել՝ հիմք ընդունելով ՀՀ Սահմանադրական դատարանի որոշումը 300.1-րդ հոդվածը հակասահմանադրական ճանաչելու մասին։
Դատարանի որոշման դեմ բողոք են ներկայացրել թե մեղադրանքի կողմը, թե պաշտպանության։ Դատախազները եւ տուժող Անդրանիկ Կետիկյանը պահանջում են բեկանել վարույթը կարճելու որոշումը եւ գործը ուղարկել նոր քննության, իսկ պաշտպանական կողմը բողոքարկել միայն դատարանի նույն որոշմամբ Ռ.Քոչարյանի խափանման միջոցն անփոփոխ թողնելու մասը։
Նշենք, որ քրօրենսգրքի 300.1-րդ հոդվածով քրեական հետապնդումը դադարեցվելուց հետո քրեական գործով շարունակում են որպես մեղադրյալ մնալ Ռոբերտ Քոչարյանն ու Արմեն Գեւորգյանը, քանի որ նրանք մեղադրվում են նաեւ կաշառքի դրվագով։ Պաշտպանական կողմը միջնորդել էր Ռ. Քոչարյանի նկատմամբ ընտրված խափանման միջոցը՝ 2 միլիարդ ՀՀ դրամի չափով գրավը վերացնել կամ դրա չափը նվազեցնել, ինչը մերժվել էր։
Բողոքները մակագրվել են Վերաքննիչ դատարանի դատավոր Նարինե Հովակիմյանին, կազմում են դատավորներ Սևակ Համբարձումյանն ու Կարեն Մարդանյանը:
