Մայիսի 25-ին Բրյուսելում ԵՄ գագաթնաժողովի ընթացքում կքննարկվի կորոնավիրուսի դեմ պատվաստանյութերի միասնական հավաստագիր ունենալու հարցը: Այս մասին այսօր Պորտու քաղաքում անցկացված ԵՄ ոչ պաշտոնական գագաթնաժողովի ժամանակ հայտնել է Եվրոպական խորհրդի նախագահ Շառլ Միշելը․
«Մենք քննարկել են, այսպես կոչված «կանաչ անցագրի» ներդրման թեման և որոշել ենք այդ հարցին անդրադառնալ մայիսի 25-ին կայանալիք գագաթնաժողովին: Այդ ժամանակ մենք կարձանագրենք բոլոր ջանքերը, որոնք արդեն ներդրվել են այս ուղղությամբ, որպեսզի ընդհանուր հայտարարի գանք»։
ԵՄ երկրները մարտ ամսից քննարկում են բոլոր 27 երկրների համար ընդունելի հավաստագրի ներդրման հարցը: Եվրահանձնաժողովը ներմուծել է «կանաչ թվային անցագիր» եզրույթը և առաջարկել է, որ այս փաստաթուղթը տվյալների երեք կատեգորիա ընդգրկի՝ պատվաստման ամսաթիվը, COVID-19-ով հիվանդանալու ամսաթիվը և թեստավորման պատասխանը:
Միևնույն ժամանակ մինչ օրս պարզ չէ, թե ինչի համար և ինչ իրավիճակներում կարող է տվյալ փաստաթուղթն օգտագործվել: Վերջնական համաձայնություն չկա նաև այն հարցում, թե արդյոք «կանաչ անցագրում» ներառվելու են միայն ԵՄ երկրներում հավանության արժանացած պատվաստանյութերով պատվաստվելու մասին տեղեկությունները, թե երկրներն իրավունք կունենան ավելացնել պատվաստանյութեր, որոնք հավանության կարժանանան ազգային կարգավորողների կողմից, բայց ԵՄ համապատասխան կառույցների հաստատումը ստացած չեն լինի:
Նախադեպը Հունգարիայում է: Այս երկիրը լայնորեն կիրառում է «Sputnik V» պատվաստանյութը , որը դեռ Դեղերի Եվրոպական գործակալության հավանությանը չի արժանացել: