Uniao Quimica դեղագործական ընկերությունը Բրազիլիայում կսկսի Sputnik V պատվաստանյութի արտադրությունը՝ առանց սպասելու, որ դեղը կհաստատվի Սանիտարական տեսչության ազգային գործակալության կողմից: Այս մասին հինգշաբթի օրը հայտարարել է դեղագործական ընկերության ղեկավար Ֆերնանդո Մարկեսը:
«Հաջորդ շաբաթ մենք ակտիվ նյութի խմբաքանակ կստանանք Մոսկվայից և կսկսենք պատվաստանյութը շշալցնել Գուարուլհոսի գործարանում», -ասել է դեղագործական ընկերության ղեկավարը՝ խորհրդարանական լսումների ժամանակ:
Նա նաև պարզաբանել է, որ Բրազիլիայում ակտիվ բաղադրիչի արտադրությունը նախատեսվում է սկսել պատվաստանյութը մշակած Գամալեայի համաճարակաբանության և մանրէաբանության ազգային հետազոտական կենտրոնից եզրակացություն ստանալուց հետո:
Հունվարի սկզբին Uniao Quimica- ն ստացել էր դեղամիջոցի պատրաստման բջջային նյութը և հետազոտական նպատակներով սկսել արտադրել պատվաստանյութի ակտիվ բաղադրիչների փորձնական խմբաքանակ: Մարտի վերջին Բրազիլիայում արտադրված ամբողջ խմբաքանակն ուղարկվել է Գամալեա կենտրոն՝ որակի վերահսկողության նպատակով։