Կոլումբիայի մայրաքաղաքում հարկային բարեփոխումների դեմ բողոք ակցիաների ֆոնին դադարեցվել է COVID-19- ի դեմ ախտորոշման և պատվաստման կետերի աշխատանքը։
«Ցավով ես հրամայեցի փակել COVID-19-ի համար PCR ախտորոշիչ կայանները, ինչպես նաև պատվաստումների կայանները, որոնք վերջին օրերին մեր հպարտությունն էին: Ներկայիս պայմանները թույլ չեն տալիս մեզ շարունակել աշխատանքն այնպես, ինչպես կցանկանայինք»,- գրել է Բոգոտայի առողջապահության պատասխանատու Ալեխանդրո Գոմեսը Twitter- ում:
Կոլումբիայի քաղաքներում հարկերի բարձրացման դեմ ցույցը շարունակվում է արդեն երկու շաբաթ, չնայած նախագահ Իվան Դուկեն հրապարակավ չեղյալ է հայտարարել բենզինի և կոմունալ ծառայությունների ավելացված արժեքի հարկի ավելացման գաղափարը։
Հարկային բարեփոխումը չեղյալ հայտարարելուց բացի, ցուցարարներն այժմ էլ պահանջում են վերանայել շտապօգնության և առողջապահության ոլորտի բարեփոխումները, ապառազմականացնել քաղաքները, դադարեցնել քաղաքացիների սպանությունը և պատժել ցուցարարների սպանության համար մեղավորներին:
Կոլումբիայի օմբուդսմենի գրասենյակը հայտնել է, որ մեկ շաբաթվա ընթացքում Կոլումբիայում բախումների հետևանքով զոհվել է 18 ցուցարար և մեկ ոստիկան, իսկ 89 մարդ անհետ կորել է: Պաշտպանության նախարարության և քաղաքային իշխանությունների տվյալներով՝ երկու կողմից էլ վիրավորվել է ավելի քան 900 մարդ, ևս 431-ը՝ բերման ենթարկվել: