Մայիսի 5-ին Հայաստան է ժամանում ՌԴ արտգործնախարար Լավրովը, որը Հայաստանում կաշխատի երկու օր: Իսկ մայիսի 10 և 11-ին Լավրովը մեկնում է Բաքու: Որն է նրա այցերի նպատակը: Այդ հարցը մենք դիտարկել ենք դեռևս օրեր առաջ, երբ հայտնի դարրձավ Մակրոն-Պուտին հեռախոսազրույցի և Արցախի հարցում նոր նախաձեռնությունների վերաբերյալ նրանց պայմանավորվածության մասին: Ահա դրանից հետո Մարիա Զախարովան հայտարարեց Լավրովի աշխատանքային այցերի մասին: Իսկ մենք հարց բարձրացրինք՝ Լավրովը գալիս է այդ նախաձեռնությունների համար հող պատրաստելո՞ւ, դրանք առաջ մղելո՞ւ, թե՞ դրանց խանգարելու: Թե՞ Ռուսաստանի արտգործնախարարը Հայաստան, հետո Ադրբեջան է մեկնում այսպես ասած իր ուրույն օրակարգով և նոր պլաններով: Այդ մասին հնարավոր է անել ամենատարբեր դիտարկումները, հաշվի առնելով այն, որ իրավիճակը այդ իմաստով ոչ միայն միարժեք չէ, այլ ըստ էության բավականին բազմաշերտ է:
Մի բան հստակ է, որ, եթե Մոսկվան գործի է դնում իր դիվանագիտության այսպես ասած ծանր հրետանին, ուրեմն ունի որոշակի կարևոր արձանագրումների կարիք: Այդ իմաստով հատկանշական է, որ Լավրովը նախ այցելում է Երևան, իսկ Բաքու մեկնելու է մի քանի օր անց: Սա պայմանավորված է զուտ ժամանակացուցայի՞ն խնդիրներով, թե՞ Երևան այցից հետո Լավրովը ինչ-որ մշակումներ պետք է անի Մոսկվայում, հնարավոր է նաև Մինսկի խմբի համանախագահների հետ, որից հետո միայն դրանցով պետք է մեկնի Բաքու: Այս ամենի մասին շատ թե քիչ որոշակի դատողություններ հնարավոր կլինի անել թերևս Երևանում Լավրովի քննարկումների շեշտադրումներից և գուցե հայտարարություններից, թեև դրանք իհարկե երբեք միարժեք չեն և դատել միայն հրապարակային հայտարարություններով, թերևս հնարավոր չէ:
Այդուհանդերձ, ինչու՞ է ՌԴ արտգործնախարարը Երևան և Բաքու այցերի միջև տալիս քառօրյա դադար, դա զուտ ժամանակացուցայի՞ն հարց է, թե՞ օրակարգային: Ի դեպ, այս իմաստով թերևս երկրորդական հանգամանք չէ և այն, որ ռուս խաղաղապահները մայիսի 9-ին նախատեսում են հաղթանակի օրվա առիթով այսպես ասած շարանցում անել Արցախում, ինչը արդեն իսկ բավական դժգոհություն է առաջացրել Բաքվում: Արդյո՞ք ՌԴ արտգործնախարարը գերադասել է Բաքու մեկնել դրանից հետո՝ այսինքն Արցախում ռուս խաղաղապահների «հաղթանակային միջոցառումից« հետո, ոչ թե առաջ: Հնարավո՞ր է, որ Մոսկվան փորձելու է Բաքվում այսպես ասած «թանկ վաճառել» այդ միջոցառումը: Բայց ինչի՞ դիմաց:
Լուսանկարը՝ Armeniasputnik-ի