Նախօրեին ՀՀ վարչապետի պաշտոնակատար Նիկոլ Փաշինյանը կառավարությունում հյուրընկալել էր ծանրամարտի և ազատ ոճի ըմբշամարտի Հայաստանի հավաքականների անդամներին՝ հավաքականների մարզիչների գլխավորությամբ: Հիշեցնենք, որ մեր ըմբիշներն ու ծանրորդները տպավորիչ արդյունք էին ցույց տվեց Եվրոպայի առաջնությունում և օլիմպիական խաղերի վարկանիշային մրցաշարում։ Հանդիպմանը ներկա են եղել նաև Կրթության, գիտության, մշակույթի և սպորտի նախարարի պաշտոնակատար Վահրամ Դումանյանը, ԿԳՄՍ փոխնախարար Կարեն Գիլոյանը, Ն. Փաշինյանի գլխավոր խորհրդական Արայիկ Հարությունյանը, պաշտոնատար այլ անձինք: Մեր մարզիկների վերջին հաջողությունները բարձր գնահատելուց զատ Փաշինյանը կրկին կատարեց կարևոր շեշտադրում՝ ներկայացնելով հայկական սպորտի զարգացման իր տեսլականն ու նպատակները։ «Կարծում եմ՝ ընդհանրապես սպորտը, հաղթանակները, կամ հաջողությունները և անհաջողություններն արտահայտում են այն խորքային պրոցեսները, որոնք երկրում տեղի են ունենում: Այս առումով մենք մեր բոլոր ռազմավարություններում սպորտին շատ մեծ ուշադրություն ենք դարձնում:
Նույնիսկ մինչև 2050 թվականի Հայաստանի վերափոխման ռազմավարություն ենք ընդունել, որտեղ խնդիր ենք դրել, որ մինչև 2050 թվականը Հայաստանը պետք է ունենա առնվազն 25 ոսկե օլիմպիական մեդալ, Հայաստանի ֆուտբոլի ազգային հավաքականը պետք է դառնա Եվրոպայի կամ աշխարհի առաջնության մեդալակիր: Կարևոր է այս նշաձողերը դնել և այսօրվանից աշխատել այդ նշաձողերը հաղթահարելու համար: Իհարկե, մենք հասկանում ենք, որ սրա համար էական է սպորտի ֆինանսավորումը, մարզական ենթակառուցվածքների ձևավորումը և մի քանի նախագծեր արդեն իսկ իրականացնում ենք: Տեսեք, այսօր մենք, օրինակ, ի՞նչ պրոբլեմ ունենք. մեր դպրոցների մի հսկայական մասում մարզական ենթակառուցվածքներ չկան, այսինքն՝ ֆիզկուլտուրայի դասեր անելու պրիմիտիվ պայմաններ չկան: Մեր բարձրագույն ուսումնական հաստատություններում մարզական ենթակառուցվածքներ չկան: Օրինակ, մենք խոսում ենք օլիմպիական շարժման և հաջողության մասին, բայց ամբողջ աշխարհում օլիմպիական շարժման ամենակարևոր սեգմենտներից մեկն ուսանողական սպորտն է: Հայաստանում, ցավոք, ուսանողական սպորտը շատ լուրջ պրոբլեմներ ունի, հենց թեկուզ ենթակառուցվածքների բացակայության պատճառով: Երբ մենք շատ դեպքերում տեսնում ենք, թե աշխարհի կամ օլիմպիական խաղերի մեր չեմպիոններն ինչ պայմաններում են պարապում, մենք ընդհանրապես ասում ենք՝ լավ, ինչպե՞ս է դա հնարավոր, որ այսպիսի պայմաններում մարդը կարողանում է դառնալ Եվրոպայի, աշխարհի, օլիմպիական խաղերի չեմպիոն:
Սա ի՞նչ է նշանակում: Սա նշանակում է, որ եթե այս պայմաններում այս հաջողությունները մենք ունենք, եթե մեր ենթակառուցվածքները, ֆինանսավորումը և մնացած պայմաններն այլ լինեն, մենք, իսկապես այն, ինչ ասում ենք՝ 25 օլիմպիական մեդալ, այդ դեպքում ո՛չ կասկած, ո՛չ էլ ժպիտ կհարուցի, այսինքն՝ դա կլինի խնդիր, որը բոլորս կհամարենք լուծելի»,- նշել է ՀՀ վարչապետի պաշտոնակատարը: Սա այն դեպքերից է, երբ վարչապետի յուրաքանչյուր արտահայտության և բառի հետ կարելի է համաձայնել։ Նիկոլ Փաշինյանը հստակ պատկերացում ունի թե սպորտում առկա խնդիրների մասին, թե զարգացման ճանապարհի։ Այո, վերջին ամիսներին ունեցանք ոգևորության առիթներ։ Հայաստանի ազգային հավաքականը պատմական արդյունք գրանցեց աշխարհի առաջնության ընտրական փուլի մեկնարկում։ Ըմբիշներն ու ծանրորդներն իրենց բարձրության վրա էին։ Գերազանց ելույթ ունեցավ մարմնամարզիկ Արթուր Դավթյանը՝ դառնալով Եվրոպայի չեմպիոն։ Բայց ասել, որ տեղի ունեցածը պետական ծրագրի իրագործման արդյունք է միանգամայն ճիշտ չի լինի։ Փաշինյանը ակնկալում է, որ առաջիկա 30 տարիներին կունենանք առնվազն 25 օլիմպիական չեմպիոններ։ Նման արդյունքի հիմքում ՀՀ կառավարության ղեկավարը տեսնում է սպորտի մասսայականացումը։ Իսկ ինչպե՞ս հասնել նման արդյունքի։ Սառը դատելով իրավիճակը՝ պետք է ընդունենք, որ սպորտի զարգացման կարևոր բաղադրիչներից մեկը, եթե ոչ կարևորը՝ ֆինանսներն են։ Ներդրումներ չանելու պարագայում շատ արագ կարող ենք կորցնել այն, ինչ ունենք։
Փաշինյանի լավատեսական նպատակներին զուհագեռ ՀՀ կառավարությունը նախորդ տարվա համեմատ 170 միլիոն դրամով նվազեցրել է սպորտի և մասնավորապես մարզական ֆեդերացիաների ֆինանսավորումը։ Տեղի ունեցածը ուղղակի պարադոքսալ երևույթ կարելի է համարել։ Ունենալով 25 օլիմպիական ոսկի նվաճելու նպատակ մենք նվազեցնում ենք ֆինանսական հոսքերը դեպի սպորտ։ Իսկ թե ինչի կարող է հանգեցնել ֆինանսավորման նվազեցումը անդրադարձել էինք մեր նախորդ հրապարակումներում։ Մեկնաբանությունները թերևս ավելորդ են։
