Ռուսաստանի և ասիական շուկաների ֆոնդային ինդեքսների անկումը պայմանավորված է Standard & Poor’s վարկանիշային կազմակերպության կողմից ԱՄՆ վարկային վարկանիշի՝ AAA-ից մինչև AA+ իջեցմամբ: Այս մասին «Առաջին լրատվականի» հետ զրույցում ասաց ՀՀ նախկին վարչապետ, տնտեսագետ Հրանտ Բագրատյանը:
«Քանի որ իջեցվեց ԱՄՆ-ի վարկանիշը, ԱՄՆ-ում խնայողություններ պահող երկրների (Չինաստան, Ռուսաստան, Ճապոնիա) ակտիվները պետք է արժեզրկվեին: Բոլոր այն ընկերությունները, որտեղ ռուսական պետությունը փայ ունի, և բոլոր այն ընկերությունները, որոնք փայ ունեն ռուսական պետության մասնակցությամբ ընկերություններում, նրանց բաժնետոմսերի գները, բնականաբար, պետք է նվազեին»,- ասաց Հ.Բագրատյանը:
Հարցին, թե արդյոք այն, ինչ կատարվում է, կարելի՞ է համարել ճգնաժամի երկրորդ ալիք, որի մասին ինքը խոսել է դեռևս 3 տարի առաջ, Հ. Բագրատյանը պատասխանեց. «Ես, իհարկե, մարգարե չեմ, բայց 2008-ի աշնանը ասում էի՝ հիմնական խնդիրը հավասարակշռության բացակայությունն է, իսկ իրականացվող քայլերը այս խնդիրը չեն լուծելու, հակառակը՝ խորացնելու են անհավասարությունները»:
Հ.Բագրատյանի խոսքով՝ դոլարը հանդիսանում է միջազգային պահուստային արժույթ, սակայն ԱՄՆ-ն այն կարող է արժեզրկել՝ առանց որևէ այլ պետության հետ խորհրդակցելու: Մյուս կողմից, ըստ Հ.Բագրատյանի՝ Արևմուտքում արտադրության աճին խոչընդոտում է տեղի թանկ աշխատուժը, սակայն կապիտալն Արևմուտքից այդպես էլ չի գնում էժան աշխատուժով հարուստ երկրներ՝ Արևելք: ԵՄ տիպի միությունների ձևավորումն էլ, տնտեսագետի խոսքով, սահմաններ է գծում զարգացած և թույլ զարգացած երկրների միջև, փակ տնտեսություններ ստեղծում՝ էլ ավելի խորացնելով անհավասարությունը:
«Եթե Արևմուտքը այսօր չփոխի իր վերաբերմունքը Արևելքի նկատմամբ, չկատարվեն ֆունդամենտալ փոփոխություններ, հավասարակշռությունը չի վերականգնվի: Այն քաղաքականությունը, որն այսօր իրականացվում է Արևուտքի կողմից, ընդհակառակը, խորացնում է անհավասարությունը և երկար տարիներ կարող է թափ տալ ողջ համաշխարհային տնտեսությունը»,- ասաց Հ.Բագրատյանը:
