Պոլիտեխնիկական համալսարանի ռեկտորի ընտրության արդյունքների շուրջ Կրթության, գիտության, մշակույթի եւ սպորտի նախարարությունը կարծես թե վերջնական որոշում է կայացրել:
Մեր տեղեկություններով՝ ԿԳՄՍ նախարարը որոշել է հաստատել Պոլիտեխնիկական համալսարանի ռեկտորի ընտրության արդյունքները: Նախարարության բարձրագույն եւ հետբուհական մասնագիտական կրթության վարչությունից չհերքեցին այս տեղեկությունը՝ նշելով, որ պաշտոնական պատասխան կունենան վաղը:
Հիշեցնենք, որ մարտի 15-ին Պոլիտեխնիկական համալսարանի հոգաբարձուների խորհրդի նիստում հայտարարվեց, թե 17 կողմ, 5 դեմ ձայնով ռեկտոր է ընտրվել պրոռեկտոր Գոռ Վարդանյանը, իսկ արձանագրությունը ստորագրվել է հաշվիչ հանձնաժողովի 5 անդամներից 3-ի կողմից: Ընտրությունից հետո, սակայն, հայտարարվեց, որ քվեարկության արդյունքների արձանագրությունը ստորագրել է ոչ թե 3, այլ ընդամենը 2 անդամ: Մինչ այժմ Կրթության նախարարությունն ուսումնասիրում էր հոգաբարձուների խորհրդի նախագահի կողմից ուղարկված պաշտոնական գրությունը՝ պաշտոնապես որեւէ դիրքորոշում չհայտնելով:
Պոլիտեխնիկական համալսարանի ռեկտորի թափուր պաշտոնի մրցույթում հաղթող ճանաչված Գոռ Վարդանյանը 2012-2017թթ․ եղել է նշված համալսարանի ուսանողական խորհրդի նախագահը, 2017-2018 թթ․՝ Երևանի ավագանու անդամ ՀՀԿ ընտրական ցուցակով, դրա նախորդող տարիներին՝ 2011-2017թթ.՝ Ազգային ժողովի պատգամավոր: Ըստ շրջանառվող խոսակցությունների՝ նա նաեւ Արմեն Աշոտյանի սանիկն է:
Նշենք նաեւ, որ Պոլիտեխնիկի ռեկտորի մյուս 5 թեկնածուները, որոնց մի մասը դեռ մրցույթից առաջ հայտարարել էր ընտրապայքարից դուրս գալու մասին, մյուսները չէին անցել երկրորդ փուլ, համախմբված դեմ էին արտահայտվում ընտրապայքարում մնացած միակ թեկնածու Գոռ Վարդանյանի դեմ՝ կոչ անելով հոգաբարձուների խորհրդի անդամներին չկատարել ընտրություն եւ չվերարտադրել բուհի անփառունակ շարունակական կառավարումը: Ավելի վաղ էլ ռեկտորի թեկնածուներից մի քանիսը նշում էին նրա հովանավորչությամբ կատարված անօրինականությունների, ռեկտորի թեկնածուների համար ստեղծված անհավասար պայմանների մասին:
Հիշեցնենք նաեւ, որ ռեկտորի նախկին թեկնածու Դավիթ Ղազարյանը մրցույթի արդյունքներն անվավեր ճանաչելու պահանջով օրերս հայց էր ներկայացրել դատարան:
