Սյունիք կատարած այցի ընթացքում դեսպան Թրեյսին հանդիպել է մարզպետ Մելիքսեթ Պողոսյանին և համայնքների ղեկավարներ Մխիթար Զաքարյանին (Մեղրի), Առուշ Առուշանյանին (Գորիս) և Արթուր Սարգսյանին (Սիսիան): Սյունիքի մարզն ամենաշատն է տուժել համավարակի ու պատերազմի կրկնակի հարվածներից: Այս մասին հայտարարություն է տարածել ՀՀ-ում ԱՄՆ դեսպանատունը:
«Մարզպետն ու համայնքների ղեկավարները դեսպանին ավելի մանրամասն ներկայացրին իրավիճակը և քննարկեցին պատերազմի հետևանքով տեղահանվածներին ԱՄՆ կառավարության կողմից տրամադրվող մարդասիրական օգնության տրամադրումը: Դեսպան Թրեյսին հայ պաշտոնյաների հետ զրույցում նաև անդրադարձավ մարզի զարգացմանն ուղղված ԱՄՆ շարունակական աջակցությանը»,- ասված է դեսպանատան տարածած հայտարարության մեջ:
Ամերիկագետ Սուրեն Սարգսյանի կարծիքով՝ ԱՄՆ դեսպանի այցը ճանաչողական բնույթ ունի.«Պատերազմից հետո նոր իրավիճակ է, նոր սահմաններ, նոր խնդիրներ և բնական է, որ դեսպաններն այդ ամենը ուսումնասիրելու կարիք ունեն։ Հավանաբար սա ավելի շատ ճանաչողական այց է։ Չեմ բացառում նաև, որ Միացյալ Նահանգներն ինչ-որ ծրագրեր ֆինանսավորեն համայնքներում, համայնքներին ֆինանսական աջակցություն ցուցաբերեն։Կարծում եմ, որ այն հանդիպումները, որոնք տեղի են ունենում դեսպանի ու համայնքապետերի, մարզպետի միջև՝ հենց այս օրակարգի շուրջ է»,-«Առաջին լրատվական»-ի հետ զրույցում ասաց նա։
Մեր զրուցակիցը նաև ընդգծեց՝ գլոբալ առումով պետք է դիտարկենք նաև այն հանգամանքը, որ Սյունիքը Իրանի հետ սահմանակից է. «Այդ առումով իհարկե ռազմավարական նշանակություն ունի ոչ միայն մեր, այլ նաև Միացյալ Նահանգների համար։Սա, եթե նայենք ավելի գլոբալ, աշխարհաքաղաքական տեսանկյունից։ Բայց ես չեմ կարծում, որ այստեղ ինչ-որ գլոբալ պրոցես է տեղի ունենում։ Կարծում եմ, որ այս այցը կոնկրետ առավելապես կրում է ճանաչողական բնույթ»։
Սուրեն Սարգսյանը նաև կարծում է, որ Սյունիքի հետ կապված կան որոշակի վտանգներ.«Ինչպես արդեն նշեցի՝ Սյունիքը ոչ միայն մեզ համար է արտաքին սահման, այլ նաև Իրանի ու սա նշանակում է, որ եթե Սյունիքը ենթադրենք անցնի թուրքական կամ ադրբեջանական վերահսկողության ներքո, դա կնշանակի, որ Իրանը արտաքին սահման է կորցնում և ոչ միայն Հայաստանի, այլ ԵԱՏՄ-ի հետ՝ ընդ որում միակ ցամաքային սահմանը։ Այնպես որ բնականաբար սա հետաքրքրում է ոչ միայն մեզ, այլ նաև մի շարք այլ պետությունների ու տարածաշրջանային խաղացողներին»։
Ինչ վերաբերում է Սյունիքի հետ կապված հնարավոր հավակնություններին, ապա Սարգսյանն ընդգծեց, որ այդ մասին բացեիբաց հայտարարել է Ադրբեջանի նախագահ Իլհամ Ալիևը՝ նշելով, որ իրենք «101 տարի հետո կվերադառնան Սյունիք»։