ՉԺՀ-ի նախագահ Սի Ծինպինը ճառով հանդես կգա կլիմային նվիրված գագաթնաժողովում: Ապրիլի 21-ին այդ մասին հայտարարել է ՉԺՀ-ի արտգործնախարարության պաշտոնական ներկայացուցիչ Հուա Չունինը։ «ԱՄՆ-ի նախագահ (Ջո) Բայդենի հրավերով ՉԺՀ-ի նախագահ Սի Ծինպինն ապրիլի 22-ին տեսակապով կմասնակցի կլիմային նվիրված գագաթնաժողովին և հանդես կգա կարևոր ճառով»,- մեջբերում է նրա հայտարարության տեքստը «Սինհուա» գործակալությունը:
ԱՄՆ-ը մտադիր է ապրիլի 22 – 23-ն անցկացնել միջազգային գագաթնաժողով՝ նվիրված կլիմայի փոփոխման դեմ պայքարի հարցերին, գագաթնաժողով են հրավիրված աշխարհի 40 ղեկավարներ:
Միջոցառումը նվիրված կլինի շրջակա միջավայր վնասակար արտանետումների կրճատման ջանքերի համախմբման թեմային: Անցյալ շաբաթ կլիմայի հարցերով Միացյալ Նահանգների նախագահի հատուկ դեսպանորդ Ջոն Քերին այցելել Է Շանհայ, որտեղ հանդիպում է անցկացրել չինացի պաշտոնակից Սե Չժենհուայի հետ: Կողմերն ընդունել են համատեղ հայտարարություն կլիմայի փոփոխման դեմ պայքարի վերաբերյալ, որտեղ պատրաստակամություն են հայտնել աշխատելու Փարիզի համաձայնագրի իրականացման նպատակով: Վաշինգտոնը և Պեկինը մտադիր են, մասնավորապես, մոլորակի վրա ջերմաստիճանի բարձրացման մակարդակը պահապանել 2 աստիճանից ցածր նշագծում և ձգտել այդ ցուցանիշի մինչև 1,5 աստիճան սահմանափակման։
