Պահածոներ պատրաստում է հայ ընտանիքների գրեթե 90 տոկոսը: Ընդ որում, պահածոներ են պատրաստում տարբեր հումքատեսակներից, ու կարևոր չէ՝ այդ հումքատեսակն աճո՞ւմ է տվյալ վայրում, թե՞ ոչ: Օրինակ՝ Գյումրիում պահածոներ են պատրաստում ծիրանից, Արարատյան դաշտավայրում՝ փշարմավից (չիչխան), որոնք տվյալ վայրերում չեն աճում: Այս մասին «Առաջին լրատվական»-ի հետ զրույցում ասաց պահածոների արտադրության ինժեներ-տեխնոլոգ, դոցենտ Ժիրայր Աղաջանյանը:
«Եթե մեր բնակչության թիվը հաշվարկենք 3 միլիոն և ընտանիքների անդամների թիվը՝ 4-5 անձ, ապա կունենանք շուրջ 800 հազար ընտանիք: Մեկ ընտանիքը 1 լիտր պահածոյի տուփի հաշվով դիտարկելու դեպքում ամեն ընտանիքի, շուրջ 10 տուփի հաշվարկով, բաժին կհասնի 50 տուփ: Եթե 50 տուփը բազմապատկենք 800 հազարով, ապա տարվա կտրվածքով կստացվի 40 միլիոն»,- ասաց նա՝ ավելացնելով, որ կստացվի 120-150 պայմանական տուփ պահածո յուրաքանչյուր ընտանիքին:
Նրա խոսքով՝ ընտանիքներում պահածոյացումը վերահսկողությունից դուրս գտնվող չափազանց լուրջ խնդիր է. մթերքը կարող է տոքսիկ լինել, բացի այդ, իջեցվում է սննդարժեքն, ու այն դառնում է ոչ անվտանգ:
Նրա կարծիքով՝ պահածոյացման խնդիը պատկանում է մնայուն խնդիրների թվին, քանի որ հնարավոր չէ ասել, թե կգա մի ժամանակ, երբ մարդիկ կհրաժարվեն սննդամթերքի պահածոյացումից:
Այն հարցին՝ արդյո՞ք ներկայումս չի նկատվում պահածոյացման նվազման միտում, Ժ. Աղաջանյանը պատասխանեց, որ դա ավելի շատ կապված է էներգետիկ ծախսերի հետ: Նվազման միտումը, նրա խոսքով, ավելի շատ դիտվել է 10 տարի առաջ՝ պայմանավորված սոցիալական խնդիրներով:
«Ներկայումս ճիշտ հակառակն է: Համենայն դեպս, հնարավոր է այնպես անել, որ սնունդն անվտանգ կերպով պահպանվի»,- խոսքը եզրափակեց սննդարտադրության տեխնոլոգը:
