Հայ ռազմագերիների, այլ գերեվարված և տեղահանված անձանց հարցի քննարկումը քվեարկությամբ ներառվել է Եվրոպայի խորհրդի Խորհրդարանական վեհաժողովի (ԵԽԽՎ) լիագումար նիստի օրակարգում։
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության գործդիր մարմնի անդամ Նարեկ Ներսիսյանը, «Հանուն հանրապետության» կուսակցության ղեկավար մարմնի անդամ Ռոբերտ Ղևոնդյանը և «Անտարես» հրատարակչության տնօրեն Արմեն Մարտիրոսյանը:
«Պետք է սպասենք, որ հնարավորինս մեծ արձագանք ստանա խնդիրը և միջազգային ավելի մեծ ճնշում լինի ոչ միայն Ադրբեջանի, այլ նաև Ռուսաստանի նկատմամբ: Զարմանալի չէ, որ Ռուսաստանի պատվիրակությունը, հիմնական մասով, դեմ քվեարկեց, սակայն հարցը ներառվեց լիագումար նիստի օրակարգում: Կարծում եմ՝ այդ ճնշումը ժամանակի ընթացքում պետք է որ որոշակի արդյունք տա, և կարողանանք գերիների հարցը լուծել ՀՀ շահերին համապատասխան: ԵԽԽՎ-ն կառույցներից մեկն է, որի միջոցով հնարավոր է ավելի լայն արձագանք գեներացնել այս հարցի վերաբերյալ,և որի միջոցով կարելի է միջազգային խաղացողներին շահադրդել, որ այդ ճնշումը տեղի ունենա»,-նշեց Ռոբերտ Ղևոնդյանը:
Կա տեղեկատվություն, որ ՌԴ պատվիրակության անդամներից 5-ը դեմ է քվեարկել, 7-ը ձեռնպահ՝ հայ ռազմագերիների և գերեվարված անձանց հարցը ԵԽԽՎ նիստի օրակարգում ընդգրկելու վերաբերյալ քվեարկության ժամանակ: Նարեկ Ներսիսյանի դիտարկմամբ՝ եթե այդ տեղեկատվությունը հաստատվի, ապա դա կլինի տարօրինակ քվեարկություն: «Դեմ են քվեարկել թուրքական, ադրբեջանական և ռուսական պատվիրակությունները: Հարց է՝ ինչո՞ւ չպետք է ԵԽԽՎ ինստիտուտը օգտագործվի այդ հարցի լուծման համար, երբ որ Մինսկի խմբի համանախագահությունն էլ կապ ունի այդ կառույցի հետ: Երևի կան նաև որոշակի շահեր՝ կապված Ուկրաինայի սահմանին սրացումների հետ: ՌԴ-ն փորձում է մեղմացնել Թուրքիայի ճնշումը Ղրիմի հարցում»,- նշեց Ներսիսյանը: Նրա դիտարկմամբ՝ ԵԽԽՎ-ում ՌԴ-ի նման քվեարկությունը եղել է Թուրքիայի և Ադրբեջանի խնդրանքով:
Արմեն Մարտիրոսյանը հարց բարձրացրեց, թե ինչու Հայաստանը ուղիղ չի բանակցում թե՛ Թուրքիայի, թե՛ Ադրբեջանի հետ. «Ինչու չենք խոսում Թուրքիայի և Ադրբեջանի հետ և ինքներս մեր հարցերն առաջ տանում, չէ՞ որ ամեն միջնորդ իր շահն ունի»:
«Մոսկվան չի ցանկանում, որ գերիների հարցը մեծ մասշտաբով քննարկվի ու լուծվի»,- ընդգծեց Ռ. Ղևոնդյանը:
Մանրամասն՝ տեսանյութում: