Նախօրեին ռուս քաղաքագետ, հասարակական գործիչ Ալեքսանդր Դուգինն ասել է, որ Մոսկվան կատարել է իր խոստումը՝ օգնել է Ադրբեջանին վերադարձնել Ղարաբաղը, հիմա հերթը Բաքվինն է՝ միանալ ՀԱՊԿ-ին և ԵԱՏՄ-ին։ Նա նաև ասել է, որ ՀԱՊԿ-ին և ԵԱՏՄ-ին միանալով՝ կդադարեցվեն բոլոր այն խոսակցությունները, որ Ռուսաստանը Հայաստանի դաշնակիցն է և դրա համար նրան պետք է օգնի․ այսպիսով՝ Հայաստանն ու Ադրբեջանը կհավասարվեն։
Արդյո՞ք իրադարձությունները հենց այդ տրամաբանությամբ են զարգանալու․ «Առաջին լրատվական»-ի հարցին վերլուծաբան Հակոբ Բադալյանը պատասխանեց․ «Բարդ է ասել, թե իրադարձություններն ինչ տրամաբանությամբ կզարգանան։ Միարժեք է, որ Ռուսաստանում փորձում են ամենատարբեր դիտարկումներով ստեղծել միջավայր, երբ կապահովվի ճկուն հարաբերությունը մի կողմից Հայաստանի և հայ հասարակության հետ, մյուս կողմից՝ ադրբեջանցիների հետ։ Ամենայն հավանականությամբ, այստեղ Դուգինն ադրբեջանցիների հետ աշխատանքի գիծն է։ Մենք նաև գիտենք՝ հայերի հետ աշխատելու տեսանկյունից էլ կան նշանակված մարդիկ՝ Զատուլին, Սոլովյով և այլն։
Սա բնորոշ է ուժային կենտրոնների քաղաքականությանը, հատկապես այնպիսի կենտրոնի, ինչպիսին Ռուսաստանն է, որը շատ վաղուց Կովկասի հարցում ուզում է նստել միանգամից երկու աթոռի վրա, քանի որ, որպես գլխավոր գործընկեր, ընտրել է Թուրքիային և նրա հետ փորձում է պայմանավորվել ռեգիոնը բաժանելու, կառավարելու առումով։ Այնպես որ՝ այն մտքերը, գաղափարները, որոնք շոշափում է Դուգինը, նոր չեն։ Դրանք քաղաքականության իմաստով չեմ կարող ասել՝ ամբողջությամբ, բայց զգալիորեն իրացվում են։ Սակայն Դուգինի այն հայտարարությունը, որ Մոսկվան կատարել է իր խոստումը՝ օգնել է Ադրբեջանին վերադարձնել Արցախը, փաստացի նշանակում է, որ Մոսկվան է նախաձեռնել Արցախի դեմ պատերազմը»։
Մանրամասները՝ տեսանյութում։