Մեծ Բրիտանիայի թագուհի Եղիսաբեթ II-ը հանգուցյալ ամուսնու՝ արքայազն Ֆիլիպի դագաղին, մանկության մականունով ստորագրված նամակ է թողել: Գրությունը ստորագրված է եղել Լիլիբեթ անունով:
Ըստ People-ի, այս մականունը Եղիսաբեթ II-ին տվել է նրա հայրը՝ թագավոր Գևորգ VI-ը: Բանն այն է, որ երեխա ժամանակ նա չի կարողացել արտասանել իր անունը: Ավելի ուշ թագուհուն այդ անունով է կանչել նրա ամուսինը՝ արքայազն Ֆիլիպը:
Ապրիլի 17-ին Էդինբուրգի դուքս, արքայազն Ֆիլիպին հուղարկավորել են Վինձորի ամրոցի Սուրբ Գևորգ մատուռում, որը գտնվում է միապետի լոնդոնյան նստավայրից ոչ շատ հեռու:
Էդինբուրգի դուքս Ֆիլիպի դագաղը՝ մարմարե պատվանդանով հանդերձ, հատուկ վերելակի օգնությամբ իջեցրել են ստորգետնյա թագավորական դամբարան, որը ժամանակավոր հանգրված է լինելու արքայազն Ֆիլիպի համար: Ինչպես նշվում է, թագուհու մահից հետո վերջինիս կվերահուղարկավորեն նրա հետ միասին մատուռի այն հատվածում, որտեղ հանգչում են Եղիսաբեթ II-ի հայրը՝ Գևորգ VI-ը, նրա կինը, ինչպես նաև թագուհու կրտսեր քույրը՝ արքայադուստր Մարգարեթը: