Ռուսաստանի անվտանգության դաշնային ծառայությունը պատմել է Բելառուսում հեղաշրջում նախապատրաստելու մանրամասների և հանրապետության նախագահ Ալեքսանդր Լուկաշենկոյի դեմ կազմակերպվող մահափորձի մասին: Այս մասին հայտնում է РИА Новости- ն՝ հղում անելով ռուսական հատուկ ծառայությանը:
Ըստ ԱԴԾ-ի, ԱՄՆ-ի և Բելառուսի երկքաղաքացի Յուրի Զյանկովիչը և Բելառուսի քաղաքացի Ալեքսանդր Ֆեդուտան պատրաստվում էին գրավել ռադիոյի և հեռուստատեսության կենտրոնները՝ արգելափակելով Մինսկում կառավարությանը հավատարիմ ներքին զորքերի և ոստիկանության հատուկ նշանակության ստորաբաժանումների աշխատանքը: Բացի այդ, նրանք պլանավորել են անջատել հանրապետության ամբողջ էներգահամակարգը՝ իրավապահ մարմինների և ուժայինների գործողությունները խոչընդոտելու համար:
ԱԴԾ-ն նշում է, որ որոշ զինված կազմավորումներ պետք է սկսեին ռազմական հեղաշրջման ակտիվ փուլը:
Գաղտնի ծառայությունը նշել է նաև, որ դավադիրների վերջնական նպատակը սահմանադրական համակարգի փոփոխությունը և իշխանությունը «Ազգային հաշտեցման կոմիտեին» հանձնումն է եղել:
Շաբաթ՝ ապրիլի 17-ին, ԱԴԾ-ն հաղորդեց Բելառուսում հեղաշրջում պատրաստող երկու անձանց ձերբակալելու մասին: Նրանք ասացին, որ հանրապետությունում հեղաշրջումը նախատեսվում էր իրականացնել Մինսկում` մայիսի 9-ին՝ Հաղթանակի շքերթի ժամանակ: