Ռուսաստանի հայերի միության նախագահ Արա Աբրահամյանը մտադիր է ակտիվ մասնակցություն ունենալ հայաստանյան առաջիկա ընտրություններին: Նա գործող իշխանության նկատմամբ կոշտ ընդդիմություն է, սակայն մտադիր չէ աջակցել նաև նախկին իշխանությունները ներկայացնող ուժերին: Russia-armenia.info լրատվական կայքի խմբագիր, Հայ-ռուսական կազմակերպությունների համակարգող խորհրդի համանախագահ, հասարակական գործիչ Արամ Խաչատրյանը մեզ հետ զրույցում նշել է, որ Ռուսաստանի հայ համայնքը կողմ է, որ Արա Աբրահամյանը ակտիվորեն մասնակցի ընտրություններին, և ինքը հաճախ է լսել, որ ռուսահայ տարբեր համայնքների ներկայացուցիչներ պնդել են, որ Աբրահամյանը դնի իր թեկնածությունը: Նախ նշենք, որ Արա Աբրահամյանը չի կարող դնել իր թեկնածությունը և ընդհանրապես լինել թեկնածու, քանի որ նա չի համապատասխանում պատգամավորի թեկնածու լինելու սահմանադրական պահանջներին: Ինչ վերաբերվում է որևէ ուժի աջակցելուն, ապա պետք է հիշել, որ Արա Աբրահամյանը ժամանակին աջակցեց ՀՌԱԿ-ին, սակայն այդ կուսակցությունը չհաղթահարեց խորհրդարան մտնելու արգելքը: