Տավուշը միշտ էլ գտնվել է թշնամու թիրախում: Տավուշի մարզում պատերազմի ավարտից հետո խուճապային տրամադրություններ էին առաջացել նաև կապված այն տեղեկությունների հետ, որ իբրև թե սահմանազատման աշխատանքներ են գնում և տարածքներ են զիջվելու, ժամանակի ընթացքում պարզվեց, որ նման բան չի կարող լինել, և հիմա իրավիճակը փոխվել է: Այս մասին «Առաջին լրատվական»-ի հետ զրույցում նշեց Տավուշի մարզի ընդհանուր իրավասության դատարանի նախագահ Արման Կուրեխյանը:
Խոսելով դատական համակարգի խնդիրներից, Կուրեխյանն ընդգծեց, որ արդեն երեք տարի է ակնկալվում են բարեփոխումներ դատական համակարգում, սակայն դրանք դեռևս տեսանելի չեն:
Դատավորի խոսքով՝ դատական համակարգում ինքնամաքրման պրոցես չի ընթանում. սովորական աշխատանքային գործընթացներ են ընթանում, իսկ քաղաքականությունը չպետք է և չի առնչվում դատական համակարգին:
ԲԴԽ նախագահ Ռուբեն Վարդազարյանի նկատմամբ հարուցվել է քրեական գործ և մեղադրանք է առաջադրվել: «Ժամանակը կգա ավելի շատ տեղեկություններ կստանանք, եթե այդ գործը հասնի դատարան, իրականությունը կպարզվի այնտեղ: Ես չեմ կարծում, որ եթե գործ հարուցվեր ԲԴԽ որևէ անդամի, այլ ոչ թե ԲԴԽ նախագահի նկատմամբ, ապա այսպիսի աղմուկ կբարձրացվեր: Իմ տպավորությամբ՝ որոշ շրջանակներ պաշտպանության տակ են առել ոչ թե դատական իշխանությունը, այլ Ռուբեն Վարդազարյանին:
Անդրադառնալով դիտարկմանը, որ կա կարծիք, թե ԲԴԽ նախագահի՝ 2020թ. նոյեմբերի 15-ի հայտարարությունն է բերել այս խմորումներին, Կյուրեխյանը նշեց. «Վարդազարյանի այդ հայտարարությանը կամ կոչին ես չեմ էլ ծանոթացել, դա ինձ չի հետաքրքրել: Ես Գտնում եմ, որ դատավորը, անկախ նրանից, ինչ իրադրություն է երկրում և իրեն կոչով կդիմեն թե ոչ, պետք է աշխատի Սահմանադրությանը, օրենքներին և այլ իրավական ակտերին համապատասխան: Ես այս քրեական գործի հարուցումը նրա հայտարարության հետ կապելու համար հիմքեր չունեմ»:
Կուրեխյանը նշեց, որ Վարդազարյանը նման հայտարարություն անելու իրավունք չուներ, նա նաև ընդգծեց, որ Ռուբեն Վարդազարյանը պետք է փաստարկված հայտարարի, թե Հայաստանում ովքեր են «վնգստացող դատավորները»:
Մանրամասն՝ տեսանյութում: