«Առաջին լրատվական»-ի զրուցակիցն է վրաց քաղաքագետ Գելա Վասաձեն։
– Վրաստանի նախագահ Սալոմե Զուրաբիշվիլիի հրավերով ապրիլի 15-ին ՀՀ նախագահ Արմեն Սարգսյանը պաշտոնական այց կատարեց Վրաստան: Ինչպե՞ս եք գնահատում այցի արդյունքները: Հասկանալի է, որ նախագահները երկու երկրների առաջին դեմքերը չեն, բայց ինչ կարելի է ակնկալել երկկողմ հարաբերություններում նրանց գործողություններից։
– Հաշվի առնելով այն փաստը, որ մեր նախագահը արարողակարգային գործիչ է, իսկ ձերն էլ համարյա արարողակարգային է, ես դա դրական եմ գնահատում: Ես սատարում և հավանություն եմ տալիս: Շատ հիանալի է, որ նախագահները հանդիպում են, բայց ես կնախընտրեի, որ հանդիպեին էկոնոմիկայի նախարարները, տրանսպորտի, կապի, էներգետիկայի և այլնի պատասխանատուները: Մեզ պետք են հստակ նախագծեր և կոնկրետ լուծումներ։
– Որոնք են հետպատերազմյան շրջանում երկկողմ հարաբերությունների առաջնահերթությունները։ Վրաստանը կարո՞ղ է զարգացնել հարաբերությունները Հայաստանի հետ՝ չնայած Թուրքիայի և Ադրբեջանի հետ ռազմավարական հարաբերություններին:
– Վրաստանի ռազմավարական գործընկերությունը Թուրքիայի և Ադրբեջանի հետ միանշանակ չի խոչընդոտում Հայաստանի հետ Վրաստանի հարաբերությունների զարգացմանը: Շատ ավելի բարդ իրավիճակ է Հայաստանում Ռուսաստանի Դաշնության կտրուկ ուժեղացված ազդեցության հետ կապված: Այսօր Մոսկվան կարող է արգելափակել ցանկացած նախաձեռնություն և ցանկացած նախագիծ, որը իրեն ինչ-որ պատճառներով դուր չի գալիս: Բայց դիվանագիտությունը հենց դրա համար է, որպեսզի Երևանը կարողանա համոզել Կրեմլին, որ Վրաստանի հետ համագործակցությունը՝ որպես իրեն հարևան երկիր, անհրաժեշտ է:
– Վրաստանի արտգործնախարարը հայտարարել է, որ ՀՀ նախագահի այցից հետո մեր հարաբերությունները որակապես նոր մակարդակի կանցնեն: Ինչ եք կարծում՝ ի՞նչ նոր մակարդակի մասին է խոսքը:
– Մեր արտգործնախարարի հայտարարությունը լավն է, ուրախ եմ իր համար: Հետաքրքիր կլիներ իմանալ, թե նա ինչ նկատի ունի «որակապես տարբեր մակարդակ» հասկացություն ասելով: Իրականում ոչ մի նոր որակի կարիք չունեք: Անհրաժեշտ են կոնկրետ նախագծեր, որոնք օգտակար կլինեն ինչպես Վրաստանին, այնպես էլ Հայաստանին: Մնացած ամեն բան խորամանկություն է։
