Իրենց հյուրընկալությամբ հայտնի լեռնաձորցիները կստեղծեն բոլոր պայմանները, որ նրանք իրենց գերդաստաններով համտեսեն հովվերգական կյանքի պտուղները:
Այդ պտուղներից կարևորները`ռադիումի առողջարար ճառագայթները, մերձակա Ողջի գետում վխտացող, մոլիդբենով հագեցած համեղ ձկները և ուրանի հորատանցքերում աճեցվելիք էներգետիկ սնկերը նրանց շատ երկար կպահեն Լեռնաձորում, որովհետև այլևս ի վիճակի չեն լինի հեռանալու: Իսկ մինչ հանգուցալուծում` Լեռնաձորի դպրոցի տնօրեն պարոն Էջանացին նրանց երեխաներին կներկայացնի տեղացիների փառավոր անցյալը, երբ Դավիթ-Բեկի, Մխիթար Սպարապետի, Գարեգին Նժդեհի գլխավորությամբ տարածքը պաշպանվում էր թշնամիներից, և հազարավոր հերոսների կյանքի գնով սյունեցիները իրենց հպարտ ապրելու իրավունքն էին հաստատում:Բարեբախտաբար, մեր հակառակորդները ոչինչ չգիտեին ուրանի մասին, այլապես իրենց նպատակին կհասնեին` բացելով մարզի ուրանի հանքերը:
Ընդերքի մոլագարների հրոսակախումբը վերջին տարիներին առանձնակի ջանասիրությամբ է գործում Սյունիքում: Բնապահպանական աղետի եզրին կանգնած հարավը անզորությունից պղտորված հայացքն է հառում շուրջը`չկարողանալով ընբռնել` ով է յուրային, ով` թշնամի:
Գերխնդիրն է`մնա՞լ, թե գնալ:
Իսկ մարդիկ երազում էին, որ իրենց չքնաղ բնությունը`զարմանահրաշ Մթնաձորով, Խուստուփով,Վահանավանքով, միջազգային տուրիզմի գրավիչ անկյուն կդառնար և բազմաթիվ տեղացիներ, ընդգրկվելով ոլորտում, կազատվեին սոցիալական խնդիրներից: Տարածքը կինտերգրվեր քաղաքակրթությանը`դրանից բխող բազմաթիվ դրական երևույթներով: Վիրավոր ու կիսակենդան այդ ծրագիրը դեռևս հնարավորություն ունի կյանքի կոչվելու,եթե սարսափազդու ուրանին հնարավորություն չտանք մահացու կրակոց արձակելու:
Մինչև ե՞րբ պետք է մեր պետական այրերը տնտեսական և քաղաքական ծրագրեր կազմելիս անտեսեն դրանցում ներառվող տարածքների բնակիչների իրավունքները:
Այդ պարոններին հարց եմ տալիս.
-Մի՞թե գութ չունենք, մի՞թե հերիք չէ այն, ինչ տալիս է Սյունիքը` ինքն իրեն թալանելով, մի՞թե չեք հասկանում, որ ուրանի ծրագրի իրականացումը անջրպետ է ստեղծելու սյունեցիների և իշխանության միջև:
Զգացմունքը լիարժեք է,եթե այն համաչափորեն փոխադարձ է: Քաղաքացին պետությանը վերաբերվում է այնպես, ինչպես պետությունը` նրան. ոչ ավել, ոչ պակաս:
Սյունեցիները այս հարցում վերջնականապես կկողմնորոշվեն իշխանությունների հաջորդ քայլերը տեսնելուց հետո:
Մարատ Հարությունյան
Կապան
Բջջ-094-75-03-82