20 տարի շարունակ բանակում կոռուպցիա է եղել, իսկ ենթակա համարվող սպաներն ու զինվորները դա տեսել են։ Եվ դա բարոյահոգեբանական մթնոլորտ է ձևավորել բանակում։
Այս մասին ԱԺ նիստում իր ելույթում ասաց «Իմ քայլը» խմբակցության պատգամավոր Արման Եղոյանը։
«Բանակից շատ խոսվեց անցած օրերին, գեներալներից շատ խոսեցինք։ Ես մի քանի օրինակ բերեմ։ Ուղղակի վերջերս եմ իմացել այդ պատմությունը, դրա վրա կփորձեմ հիմա որոշակի մտքեր զարգացնել։ Պատերազմի ավարտից անմիջապես հետո և պատերազմի ընթացքում գրեթե բոլոր քաղաքական ուժերը փորձում էին սեպ խրել Հայաստանի քաղաքական ղեկավարության ու բանակի միջև։ Գլխավոր շտաբի հայտնի հայտարարության օրերին բոլոր ընդդիմադիր ուժերն ասում էին՝ մենք բանակի կողքին ենք, չէին ասում՝ Օնիկ Գասպարյանի կողքին ենք։ Հիմա չգիտեմ՝ բանակի կողքին են, թե կողքին չեն։ Հիմա ոնց որ սկսել են քննադատել Գլխավոր շտաբը։ Երևի իրենք վարչապետի հրաժարականը պահանջող բանակի կողքին էին։ Բայց ես ուզում եմ մի քանի օրինակների վրա ցույց տալ, թե ինչի հետ ենք մենք գործ ունեցել։ Մեր բանակի փառապանծ գեներալներից մեկը կառուցում է քառահարկ առանձնատուն, չգիտենք ինչ փողերով։ Բայց սա ամբողջ պատմությունը չէ։ Իր կառուցած էդ առանձնատունը վաճառում է մեր բանակի վրա։ Այսինքն՝ մեր բանակն անհատից գնում է առանձնատուն՝ իր կարիքների համար և նվիրում է այդ նույն գեներալին, ով կառուցել է այդ առանձնատունը։ Եթե գա ժամանակ ու գրվի կոռուպցիայի պատմության մասին գիրք, սա երևի կլինի առաջին էջում՝ որպես կոռուպցիայի հանճարեղ օրինակ»,- ասաց Եղոյանը։
Ըստ Եղոյանի՝ ապագա Հայաստանում չպետք է լինեն նման գեներալներ, ովքեր անհայտ ծագման փողերով իրենց իսկ կառուցած դղյակը կվաճառեն բանակի վրա, որը հետո դա կնվիրի իրենց։ «Հայաստանի ապագան լինելու է առանց նման խայտառակությունների, ու սա մենք կտեսնենք առաջիկա ընտրությունների հաշվարկի օրը»։
