Ֆրանսիայի արտաքին գործերի նախարարության պետքարտուղար Կլեման Բոնը գտնում է, որ Թուրքիան Եվրամիություն մտնելու հեռանկարներ դեռ չունի, հաղորդում է ֆրանսիական «Radio J»-ն:
«Կարծում եմ, պետք է խոստովանել, որ դա հիմնականում արհեստական է: Եվ դա ասել է երկրի նախագահը, երբ ավելի քան երկու տարի առաջ Փարիզում ընդունեց պարոն Էրդողանին «…» Քննարկումներում առաջընթաց չկա: Ներկա համատեքստում մենք տեսնում ենք, որ նման հեռանկարներ չկան»,- ասել է Բոնը ռադիոեթերում:
Թուրքիան ԵՄ-ի հետ համագործակցում է 1963թ.-ից, իսկ 1987թ.-ից միության անդամակցության թեկնածու է: Այնուամենայնիվ, Թուրքիայի կարգավիճակի շուրջ բանակցությունները սկսվել են միայն 2005թ.-ին, սակայն դրանք մի քանի անգամ ընդհատվել են կողմերի միջև տարաձայնությունների պատճառով:
«Դա չի նշանակում, որ գործընկերության և քննարկումների անհրաժեշտություն չկա: … Բայց ենթադրել, որ Եվրամիությունը պետք է ավելի ու ավելի ընդլայնվի, սխալ է և անխոհեմություն, քանի որ մենք պետք է համախմբենք և բարելավենք մեր միությունը»,- ասել է Բոնը:
Պաշտոնական Բրյուսելը Թուրքիայի հետ բանակցությունները վերսկսեց 2016թ.-ին, երբ Թուրքիան համաձայնեց նպաստել դեպի Եվրոպա միգրանտների հոսքի նվազեցմանը: