Այսօր «Հանուն հանրապետության» կուսակցությունը բողոքի ակցիա անցկացրեց Բարձրագույն Դատական Խորհրդի շենքի դիմաց։ Մասնակցում էին փաստաբաններ, իրավապաշտպաններ, դատական համակարգի ապօրինություններից տուժած քաղաքացիներ։
Թեմայի շուրջ «Առաջին լրատվական»-ի հետ զրույցում «Հանուն հանրապետության» կուսակցության անդամ Հայկ Այվազյանը նշեց, որ դատական համակարգի առողջացման խնդիրը մշտապես իրենց քաղաքական ուժի ուշադրության կենտրոնում է եղել. «Ակցիան ճանապարհներից մեկն է՝ թույլ չտալու, որ Մարտի 1-ի թեման մոռացության մատնվի, քանի որ Մարտի 1-ի գործի բացահայտումը Հայաստանի ժողովրդավարության, ինքնիշխանության հիմնասյուներից է: ԲԴԽ-ն դատական համակարգի անկախությունը երաշխավորող մարմինը պետք է լինի, և տրամաբանական է, որ բողոքի ակցիան հենց ԲԴԽ-ից ենք սկսել»:
Այվազյանի խոսքով՝ Նիկոլ Փաշինյանը հայտարարեց դատական համակարգում կտրուկ փոփոխությունների մասին և հրաժարվեց դրանից, դա թուլության նշան էր:
Վերլուծաբան Դավիթ Ստեփանյանի դիտարկմամբ՝ ՀՀ դատական համակարգը մի մեծ թնջուկ է և մեծ չարիք է մեր երկրի համար, որից հնարավորինս շուտ պետք է ազատվել:
Անդրադառնալով այսօր խորհրդարանում ծավալված քննարկումներին՝ Ստեփանյանը նշեց, որ քննադատությունները և մեղադրանքները տեղափոխում են անցյալ, բայց մեր ժողովուրդն ուզում է տեսնել երկրի ապագան, իսկ քաղաքական ուժերը տեսլական չեն ներկայացնում:
Հայկ Այվազյանի դիտարկմամբ՝ ընտրությունների համար լավ ժամանակ չէ. «Դաշտը կեղտոտված է լինելու «կապիտուլյանտ-մերժված» դիսկուրսով: Մենք պետք է փորձենք, որպես նորաստեղծ ուժ, ներկայացնել լավ ապագան»:
«Այս իրավիճակում ճիշտ կլիներ երրորդ միասնական բևեռի ձևավորումը՝ որպես լուրջ հակակշիռ իշխանության և ընդդիմության: Ինտրիգը, կարծում եմ, կպահպանվի մինչև քարոզարշավը»,- ընդգծեց Այվազյանը:
Մանրամասները՝ տեսանյութում:
