Պատերազմին վերաբերող նոր փաստեր կա՞ն․ «Առաջին լրատվական»-ի այս հարցին քաղաքագետ Ալեքսանդր Իսկանդարյանը պատասխանեց․ «Գիտեք՝ ես դրան վերաբերվում եմ ոչ թե որպես փաստի, այլ որպես դիսկուրսի։ Կարծում եմ, որ պատերազմին վերաբերող բոլոր փաստերը հայտնի կդառնան այն ժամանակ, երբ ես արդեն չեմ լինի։ Այսինքն՝ երբ պատմաբաններն այն կհետազոտեն, երբ փաստաթղթերը կբացվեն, նոր պարզ կլինի։ Գիտեք՝ քանի որ ես քաղաքագետ եմ, պատմական փաստերն ինձ հետաքրքրում են քաղաքականության մեջ նրա գործածությամբ։ Ինձ ամենաշատը հետաքրքրեց այն, որ որոշ պետական գործիչներ խոսելով արդարանում են։ Նրանք շարունակում են արդարանալ և ասել, թե ինչեր են արել տարբեր պատմական գործիչներ՝ ինչ է ասել Լևոն Տեր-Պետրոսյանը, ինչ է արել Ռոբերտ Քոչարյանը, ինչպես է իրեն պահել Սերժ Սարգսյանը։ Դրանով նրանք ուզում են ասել, որ մենք չենք ամենավատը, եղել են ավելի վատերը։ Անցյալի հետ այդ խոսակցությունը, նախկինների ու ներկաների այդ բաժանումն այսօր դրվում է որպես գաղափարախոսություն, և ինձ հայտնի է, թե ինչու։ Երբ լսում ես վարչապետին, նա անընդհատ շարունակում է խոսել անցյալի մասին՝ քիչ է մնում հասնի մինչև Թութանհամոնի կամ Տիգրան Մեծի ժամանակաշրջան, իսկ մեզ ջրի պես շատ է անհրաժեշտ խոսել ապագայի մասին։ Պետք է խոսել, թե ինչ կլինի, այլ ոչ թե 10 կամ 20 տարի առաջ ով է մեղավոր եղել»։
Իսկ չպարզե՞նք, թե ինչ է եղել, հետո նոր առաջ գնանք․ «Առաջին լրատվական»-ի այս հարցին քաղաքագետ Ալեքսանդր Իսկանդարյանը պատասխանեց․ «Գաղափարախոսության տեսակետից, երևի թե ճիշտ քայլ է, որպեսզի առաջիկա արտահերթ խորհրդարանական ընտրություններում հաղթեն։ Եկեք հիշենք՝ 3 տարի առաջ՝ հեղափոխության ժամանակ ինչպես մարդկանց ուշադրությունը սևեռեցին հեղափոխության վրա և ասում էին, որ մենք գալիս ենք, որպեսզի անցյալը մերժենք և նախկին խորհրդային ժամանակներից անցում կատարենք ժամանակակից աշխարհ, անցում կատարենք Եվրոպա, մոդեռն, զարգացում։ Այսինքն՝ խոսում էին ապագայից։ Իսկ այսօր խոսում են անցյալից՝ թե ով է վատը։ Եվ դրա մասին խոսում է ոչ միայն «Իմ քայլը», այլ նաև ընդդիմությունը»։
Մանրամասները՝ տեսանյութում։