Արեգ Գալստյանը բժիշկների ընտանիքից է։ Բնության ու բույսերի նկատմամբ սերը մանկուց է․ 3 տարեկանից հոր՝ դեղագետ, բուսաբույժ Անտոն Գալստյանի հետ զբաղվել է դեղաբույսեր հավաքելով, ապա՝ այդ նախասիրության շնորհիվ նա դարձել է դեղագետ և հետագայում հիմնադրել իր սեփական բիզնեսը՝ դեղաբույսերի և բուսական թեյերի արտադրության ոլորտում։ Այնուամենայնիվ, ՔՈՎԻԴ-19 համավարակն անդառնալի հետևանքներ կունենար նաև Արեգի ընտանեկան բիզնեսի վրա, եթե չլիներ Եվրոպական միության աջակցությունը։
ԵՄ «Կանաչ գյուղատնտեսության նախաձեռնություն Հայաստանում» (EU-GAIA) ծրագրի շրջանակներում Արեգի ընկերությանը տրամադրվել է շարժական (մոբիլ) սառնարան։
Այժմ, Արեգը մոբիլ սառնարանը կարող է տեղափոխել անհրաժեշտ այն վայրը, որտեղ հավաքվում և վերամշակվում է հումքը՝ ուշադրությունը կենտրոնացնելով բույսերը հավաքելու և արտադրելու վրա՝ առանց այլևս նախավերամշակման անհրաժեշտության։
«Ֆերմերներից մոտավորապես 40 տեսակ հումք ենք մթերում։ Նրանցից շատ քչերն ունեն անհրաժեշտ պայմաններ։ Նախկինում, երբ նրանք բույսերը չորացնում էին իրենց հասանելի ու հայտնի մեթոդներով, հումքի մի մասը փչանում էր, մի մասն էլ՝ աղտոտվում: Մենք այդ խնդիրները վերացրել ենք, իսկ արտադրանքը ստացվում է անթափոն», – պատմում է Արեգը:
Թեյերը պատրաստվում են տարբեր խոտաբույսերից, ինչպես նաև մրգերից և հատապտուղներից։ Ընկերությունը և արտադրության ծավալները տարեց տարի ընդլայնվում են։
Ի հեճուկս ՔՈՎԻԴ-19 համավարակի մարտահրավերների՝ Արեգը ոչ միայն չի ընդհատել արտադրական գործունեությունը, այլև պատրաստ է նոր որակով ու արտադրատեսակներով գրավել նոր շուկաներ։
ԵՄ «Կանաչ գյուղատնտեսության նախաձեռնություն Հայաստանում» (EU-GAIA) ծրագրի շրջնակներում՝ Եվրոպական միությունն այդ աջակցությունն է տրամադրել Հայաստանի գյուղատնտեսության ոլորտին՝ հատկացնելով 456500 եվրո: Ծրագիրը համաֆինանսավորվում է Եվրոպական միության և Ավստրիական զարգացման համագործակցության կողմից և իրականացվում՝ Ավստրիական զարգացման գործակալության և ՄԱԿ-ի Զարգացման ծրագրի կողմից՝ համագործակցելով ՀՀ էկոնոմիկայի նախարարության հետ: