Այսօր՝ ապրիլի 13-ին, Ազգային ժողովում մեկնարկել է հերթական նիստի աշխատանքը: Այժմ քննարկվում է ՀԾԿՀ անդամի նշանակման հարցը: ՀԾԿՀ անդամի պաշտոնում առաջադրվել է Լևոն Բունիաթյանի թեկնածությունը:
«Ձեր թեթև ձեռքով ՀԾԿՀ նախագահ եք ընտրել երկրի գլխավոր բաջանաղին և մի հերթական պատուհաս բերել մեր երկրի գլխին»,- հայտարարեց անկախ պատգամավոր Արման Բաբաջանյանը և հարց բարձրացրեց. «Այդ հանձնաժողովը պաշտպանում է Հայաստանի Հանրապետությա՞ն շահը, թե՞ օլիգարխիայի, մաֆիայի, ռուսահայ շատ կոնկրետ շրջանակների, որոնք հեղափոխությւոնից հետո ևս շարունակում են տիրապետել կոնկրետ ենթակառուցվածքներ և նաև քաղաքական խնդիրներ են լուծում»:
Նա նշեց, որ Ռոբերտ Նազարյանի գործով, որով անցնում է նաև Սեյրան Օհանյանը, պետությանը պատճառվել է 7 մլրդ դրամի վնաս. «Այս հանձնաժողովը պետության զավթման կարևոր դերակատար է եղել»:
«Ես շատ կուզենայի, որ այս ԱԺ-ն անդրադառնար 2013թ. գազային խայտառակ պայմանագրին, առանց այդ ստրկական պայմանագրի վերանայման մենք չենք կարող հիմնարար լուծել գազի սակագնի հարցը: Նախորդ իշխանությունները զրկեցին Հայաստանին այլընտրանքային գազի հնարավորությունից հայտնի պատճառներով, որովհետև այդ կոնկրետ անձին, ով վերջերս հանդես էր գալիս ռուսական հեռուստաընկերության հաղորդումներից մեկով, երբևէ չի առաջնրոդվել Հայաստանի շահերով, այլ առաջնորդվել է այլ երկրի, մաֆիայի, օլիգարխիայի շահերով»,- նշեց պատգամավորը:
Նրա խոսքով` թեև ՀԾԿՀ-ն համարվում է անկախ, սակայն տարբեր բաջանաղների և ներմուծված առանձին անդամների հովանավորությունը թույլ է տալիս, որ այն կախված լինի մաֆիական և օլիգարխիկ շահերից. «ՀԾԿՀ մենք պետք է պատվիրակենք անձանց, ովքեր կամային հատկություններ ունեն դիմակայելու այն ճնշումներին, որոնք աներկբայորեն անընդհատ ներկա են այն տնտեսվարողների կողմից, որոնք տնօրինվում են հսկայական ռեսուրսների տիրապետող, նաև քաղաքական ազդեցություն ունեցող մաֆիական, օլիգարխիկ շրջանակների կողմից»:
Մանրամասն՝ տեսանյութում:
