Մոսկվայում ավարտված ծանրամարտի Եվրոպայի առաջնության մրցումային վերջին օրը Հայաստանի ներկայացուցիչներից ելույթ ունեցան գերծանր քաշայիններ Վարազդատ Լալայանն ու Գոռ Մինասյանը։ Վարազդատ Լալայանը հաջորդաբար պոկեց 200 կգ, 205 կգ, սակայն չբարձրացրեց 209 կգ: Նա այս ձևում դարձավ փոքր բրոնզե մեդալակիր: Գոռ Մինասյանն անթերի կատարեց պոկում վարժության բոլոր երեք մոտեցումները՝ 205 կգ, 211 կգ և 216 կգ: Մինասյանը նվաճեց փոքր արծաթե մեդալ: Պոկում վարժությունում աշխարհի նոր ռեկորդ սահմանեց վրացի Լաշա Տալախաձեն՝ բարձրացնելով 222 կգ: Հրում վարժությունում Գոռ Մինասյանը գլխավերևում պահեց 240 կգ, 248 կգ, բայց չբարձրացրեց 252 կգ: Այս ձևում նա դարձավ արծաթե մեդալակիր: Երկամարտում Մինասյանը գրանցեց 464 կգ արդյունք: Վարազդատ Լալայանը հրեց 240կգ, երկրորդ և երրորդ մոտեցման ժամանակ չկարողացավ գլխավերևում պահել 250 կգ: Այս վարժությունում նա կրկին դարձավ բրոնզե մեդալակիր: Երկամարտում Լալայանը գրանցեց 445 կգ: Եվրոպայի չեմպիոն կրկին դարձավ Վրաստանից Լաշա Տալախաձեն: Այս քաշային կարգում մերոնց ելույթները կարելի է գնահատել գերազանց։
Եվրոպայի ամենաուժեղ մարդկանց պայքարում մեր երկիրն ունի երկու ներկայացուցիչ լավագույն եռյակում։ Գոռ Մինասյանը վերջին տարիներին իր կայուն և տպավորիչ ելույթներով արդեն իսկ ապացուցել է, որ դասվում է աշխարհի լավագույն ծանրորդների շարքին։ Ինչ վերաբերում է 21-ամյա Վարազդատ Լալայանին, որը երիտասարների աշխարհի և Եվրոպայի չեմպիոն է, ապա այս ծանրորդին կարելի է դասել հայկական ծանրամարտի ծագող աստղերի շարքին։ Վստահ ենք, որ մոտ ապագայում նա ձեռնոց կնետի նույն Լաշա Տալախաձեին, որն ուղղակի մրցակցությունից դուրս է։
Մինչ Մինասյանի և Լալայանի հաջողությունը՝ մեր ծանրորդներից Իզաբելլա Յայլյանը (55 կգ) երկամարտում զբաղեցրել էր 4-րդ հորիզոնականը, իսկ հրում վարժությունում նվաճեց փոքր արծաթե մեդալ: 81 կգ քաշային կարգում Ռաֆիկ Հարությունյանը երկամարտի 346 կգ արդյունքով գրավել էր 4-րդ տեղը, իսկ հրում վարժությունում նա դարձավ փոքր բրոնզե մեդալակիր: 89 կգ քաշում Եվրոպայի չեմպիոն էր դարձել Կարեն Ավագյանը, ով երկամարտում գրանցել էր 375 կգ, ինչպես նաև արժանացել էր փոքր ոսկե (պոկում) և արծաթե (հրում) մեդալների: 81 կգ քաշային կարգում Լիանա Գյուրջյանը դարձել էր Եվրոպայի առաջնության բրոնզե մեդալակիր: Գյուրջյանը պոկել էր 98 կգ և հրել 129 կգ՝ նվաճելով նաև փոքր արծաթե մեդալ: 96 կգ քաշում Հակոբ Մկրտչյանը դարձել էր Եվրոպայի առաջնության բրոնզե մեդալակիր: Հակոբ Մկրտչյանը պոկել էր 160 կգ, սակայն հաջորդ երկու մոտեցումներն անհաջող էին: Հրում վարժությունում գյումրեցի մարզիկը նախ բարձրացրել էր 205 կգ, այնուհետև՝ 212 կգ, սակայն չբարձրացրեց 215 կգ: Նա նվաճել էր փոքր արծաթե մեդալ: Երկամարտում Հակոբ Մկրտչյանը գրանցել էր 372 կգ արդյունք: 102 կգ քաշում Սամվել Գասպարյանը դարձել է Եվրոպայի չեմպիոն, իսկ Արսեն Մարտիրոսյանը՝ փոխչեմպիոն:
109 կգ քաշում Սիմոն Մարտիրոսյանը դարձել էր փոքր ոսկե մեդալակիր, իսկ երկամարտում զրո ստացավ: Անդրադառնալով Մարտիրոսյանի ելույթին՝ պետք է նշենք, որ անկախ Հայաստանի լավագույն մարզիկներից մեկը ուներ մարզավիճակի հետ կապված որոշակի խնդիր։ Ավելին, Օլիմպիական խաղերի շեմին հնարավոր է նրա մոտ կար մոտիվացիայի պակաս։ Ծանոթ լինելով Մարտիրոսյանի որակներին՝ վստահ ենք, որ Օլիմպիական խաղերում նա միանգամայն այլ ելույթ կունենա։
«Երիտասարդ ծանրորդները շատ լավ մասնակցեցին: Ռաֆիկ Հարությունյանը գերազանցեց մեր սպասելիքները և նույնիսկ փոքր մեդալ նվաճեց: Գալիք տարի նա ամբողջապես մեծահասակների մեջ կպայքարի: Կարեն Ավագյանը, չնայած իր երիտասարդ տարիքին, ակնհայտ առաջատարն է մեծահասակների պայքարում: Ավագյանը ուժեղագույնն է այս պահին, և նրա հետ պետք է հաշվի նստել: Սամվել Գասպարյանի կարգում մտածում էինք ադրբեջանցու հնարավոր մրցակցության մասին, բայց Սամվելը նրա «հերն անիծեց»: Արսեն Մարտիրոսյանը հզոր տղա է: Հիմա մոտ երկու կգ քաշ ավելացնելու հարց կա, երբ հավաքի այդ կիլոգրամները, առհասարակ խնդիր չի ունենա: Վարազդատ Լալայանը Գոռ Մինասյանի արժանի հետնորդն է: Ապագայում նա միակ մարդն է լինելու, ով մարտահրավեր է նետելու Լաշա Տալախաձեին: Գոռ Մինասյանի բարձրացրած քաշերը լուրջ թվեր են»,- նշել է ծանրամարտի Հայաստանի տղամարդկանց հավաքականի մարզիչ Վիգեն Խաչատրյանը։
Հայաստանի ընտրանին Եվրոպայի այս առաջնությանը, որը վարկանիշային է Օլիմպիական խաղերի համար, մասնակցում էր 14 մարզիկով: Թիմային պայքարում մեծ մեդալների հաշվարկում Հայաստանի հավաքականը զբաղեցրեց 3-րդ հորիզոնականը՝ շրջանցելով կազմակերպիչ երկիր Ռուսաստանին, Թուրքիային և Ադրբեջանին, Վրաստանին։ Վերջինս զբաղեցրել է 4-րդ, թուրքերը՝ 7-րդ, ռուսները՝ 8-րդ, իսկ ադրբեջանցիները՝ 10-րդ հորիզոնականը։ Փոքր և մեծ մեդալների հաշվարկում Հայաստանը 5-րդն է և կրկին հետևում է թողել ռուսներին, թուրքերին և ադրբեջանցիներին։
