«Առաջին լրատվական»-ի զրուցակիցն է քաղտեխնոլոգ Արմեն Բադալյանը։
-Պարոն Բադալյան, ՀՀ երրորդ նախագահի փեսա Միքայել Մինասյանը հայտարարեց, որ չի մասնակցելու առաջիկա արտահերթ ընտրություններին և չի սատարելու որևէ քաղաքական ուժի։ Ձեր կարծիքով՝ այս որոշմամբ քաղաքական դաշտում իրավիճակ փոխվո՞ւմ է և ի՞նչ սպասել այն ուժերից, որոնք մնում են փողոցում։
–Փողոցում քաղաքական ուժ չի մնա, որովհետև հիմնական ազդեցիկ ուժերը, բացի Հանրապետական կուսակցությունից, մասնակցելու են արտահերթ ընտրություններին։ ՀՀԿ-ն դեռ վերջնական կարծիք չի հայտնել, բայց կուսակցության ղեկավարը նշում է, որ չի մասնակցելու։ Մնացած բոլոր ուժերը այս կամ այն ձևով մասնակցում են ընտրական գործընթացներին։ Դա Քոչարյանի դաշինքն է, Բարգավաճ Հայաստանը, Վանեցյանի քաղաքական ուժը, իշխող «Իմ քայլը» և այլ ուժեր։ Բայց մեծ հաշվով այն բոլոր ուժերը, որոնք այս կամ այն ձևով փողոցային պայքարի փորձ ունեն՝ մասնակցելու են ընտրություններին։
Ինչ վերաբերում է այն ուժերին, որոնք չեն մասնակցելու ընտրություններին, ապա պետք է նայել այդ ուժերն իրենցից որևէ բան ներկայացնու՞մ են, թե՞ ոչ։Անունը քիչ է, կարող է անուն ու վարկանիշ ունենաս, բայց որպես քաղաքական ուժ քեզնից ոչ մի բան չներկայացնես և բնականաբար քո գործողությունը ընտրական գործընթացի ժամանակ լինեն զրոյական։Դու կարող է վարկանիշ ունենաս, բայց դա դեռ չի նշանակում, որ երբ դու մասնակցես ընտրություններին՝ քո ղեկավարած ուժը այդ նույն վարկանիշը կունենա։
Իսկ այն ուժերը, որոնք ունեն որոշակի վարկանիշ, բայց չեն մասնակցելու ընտրություններին, կարող է ոչ բացահայտ գործողություններ իրականցնեն ՝ ցույց տալով, որ իրենք ահա այս նպատակն են հետապնդում, բայց ներքուստ բոլորվին այլ գործընթացներ իրականացնեն։ Խոսքը վերաբերում է միայն այն ուժերին, որոնց ղեկավարն ազդեցիկ մեկն է։ Իսկ մարդ-կուսակցությունները նման խաղեր տալ չեն կարող, որովհետև նրանց ազդեցությունը զրոյական կլինի։
-Օրինակ՝ Միքայել Մինասյանը, «Ադեկվատները» նման ռադիկալ տրամադրվածություն ունեցող այլ ուժեր կարո՞ղ են ինչ-որ խնդիրներ ստեղծել։
–Տեսականորեն ոչինչ չի բացառվում, իհարկե այստեղ էլ հարց է՝ խնդիրներ ստեղծեն ու՞մ համար, ընտրական գործողություններին մասնակցող կոնկրետ ո՞ր ուժի համար նրանք կարող են չերևացող խնդիրներ ստեղծել։ Դա շատ տարածված է, բայց չի վերաբերում կոնկրետ ձեր նշած անձին։ Հատկապես ընտրական գործընթացներում սա ամբողջ աշխարհում տարածված մի տեխնոլոգիա է։Երբ թեկնածուն հնարավոր է նաև մասնակցում է ընտրություններին, շատ լավ իմանալով, որ ինքը չի անցնի, բայց լինելով ազդեցիկ ինչ-որ ընտրազանգվածի համար կմասնակցի ու խոսքը կարող է ասել այնպիսի ինտոնացիայով, որ իր մեսիջը բոլորովին այլ կերպ ընկալվի։
-Եթե ընտրություններրը հնարավորություն են հեռացնելու իշխանություններին, ինչու՞ Միքայել Մինասյանը կամ նույն Հանրապետական կուսակցությունը չեն գնում դրան։
-Դա այդ ուժերի քաղաքական որոշումն է։ Միշտ չէ, որ հրապարակային հայտարարությունները ու կուսակցության ղեկավարության ներքին խնդիրները իրար հետ համընկնում են։Եթե գրագետ ընտրարշավ իրականացնես կարող ես հաղթել իշխանություններին։Այն բոլոր հեքիաթները, թե վարչապետը կկիրառի վարչական ռեսուրս, ի սկզբանե հաղթած է, ասում են այն մարդիկ, որոնք ի սկզբանե պարտվել են։ Եթե դու պարտված չես, ու հասկանում ես, որ վարչապետը չի կարող նույնիսկ վարչական ռեսուրսով իր համար ցանկալի արդյունք նկարել, ապա հունիսի 20-ի ընտրությունները շատ լավ առիթ են ՝ անպայման մասանցկելու ու անելու ամեն ինչ քո ուժի հաղթանակի համար։ Իսկ եթե դու չես մասնակցում, բայց հարցազրույցի ու հոդվածների, այլ մեսիջների ձևով խոսք ես հղում, պետք է շատ լավ հասկանաս, որ նախընտրական կամպանիայի ժամանակ այդ ամենը բոլորովին այլ կտրվածքով է ընկալվում, քան մինչև նախընտրական արշավը։ Քո խոսքը կարող է օգնել կամ վնասել այս կամ այն քաղաքական ուժին։