Ի՞նչ հասկացաք երեկվա տեղի ունեցածից․ «Առաջին լրատվական»-ի հարցին իրավապաշտպան Ժաննա Ալեքսանյանը պատասխանեց․ «Գիտեք՝ տեղեկությունները շատ իրարամերժ էին։ «Լրագիրը» տպել էր մի տեղեկություն, որտեղ Արթիկի փոխքաղաքապետը, որը նաև Արցախի նախագահի ներկայացուցիչն է՝ բացարձակապես ժխտում էր գերիների վերադարձի հետ կապված որևէ տեղեկություն, և ասում էր, որ եթե ես չգիտեմ, ուրեմն էդպիսի բան չկա։ Այսինքն՝ նման ինֆորմացիա չի եղել։ Գիտեք՝ երբ մարդիկ գնում ու սպասում են, բայց գերիները չեն լինում ինքնաթիռում, և կառավարությունը ոչ մի լույս չի սփռում, այն դեպքում, որ կառավարությունը հաստատել էր, որ գերիների խումբ է գալու։ Այս վերաբերմունքն անտանելի է։ Այդ ծնողների, ընտանիքների նկատմամբ զուտ մարդկային վերաբերմունքը իսպառ բացակայում է։ Վարչապետն ինքը պետք է գնար այնտեղ։ Նրանք մարդիկ են, որոնք ամեն օր ապրում են իրենց երեխաներով»։
Սա սադրա՞նք որակել, թե՞ ոչ․ «Առաջին լրատվական»-ի հարցին «Հանուն Հանրապետության» կուսակցության անդամ Արտաշես Խալաթյանը պատասխանեց․ «Ակնհայտ է, որ այստեղ բավականին մութ ծալքեր կան, որոնք, ես կարծում եմ, որ մեր պետական պատկան մարմինները պետք է պատշաճ կերպով ուսումնասիրեն և գուցե նաև հավելյալ պարզաբանմամբ հանդես գան։ Փաստ է, որ արդեն որերորդ անգամ է երևակվում է մեր պետական մարմինների միջև սինքրոնացած աշխատանքի բացակայությունը։ Առաջին անգամ չէ, երբ վարչապետի մամուլի խոսնակը, փոխվարչապետի գրասենյակը, պաշտպանության նախարարությունը, Ազգային ժողովի փոխխոսնակը և այլ պաշտոնյաներ որևիցե իրողության վերաբերյալ տալիս են իրար հակասող գնահատականներ կամ պարզաբանումներ, և հետո դուրս է գալիս բոլորովին այլ բան։ Դա ցույց է տալիս մեր պետական կառույցների թափթփված աշխատանքը»։
Իսկ ո՞ւմ էր դա պետք, ո՞ւմ էր դա ձեռնտու․ «Առաջին լրատվական»-ի հարցին «Արդար Հայաստան» կուսակցության փոխնախագահ Դավիթ Կարապետյանը պատասխանեց․ «Ադրբեջանական կողմը հստակ դիրքորոշում է տվել, որ տվյալ մարդիկ չեն համարվում գերիներ, այլ նրանք համարվում են դիվերսանտներ։ Մեր համար, բնականաբար, նրանք գերիներ են, և համաձայն 8-րդ կետի՝ պետք է լինի գերիների վերադարձ»։
Մանրամասները՝ տեսանյութում։