Ապրիլի 7-ին Մոսկվայում վարչապետ Նիկոլ Փաշինյանը ուշագրավ հայտարարություն արեց՝ ասելով, որ ցանկանում է Պուտինի հետ քննարկել Հայաստանում նոր ատոմակայանի կառուցման հնարավորությունը։
«Հայատոմ» գիտահետազոտական ինստիտուտ» ՓԲԸ գլխավոր տնօրեն, «Հայկական ատոմային էլեկտրակայան» ՓԲԸ տնօրենների խորհրդի նախագահ, տեխնիկական գիտությունների դոկտոր, պրոֆեսոր Վահրամ Պետրոսյանը «Առաջին լրատվական»-ի հետ զրույցում ասաց, որ նոր ատոմակայանի կառուցումն անխուսափելի է. «Առանց նոր ատոմակայանի մեր երկրի էներգետիկ անվտանգությունն ապահովել հնարավոր չէ»։
Պետրոսյանի խոսքով՝ մինչ նոր ատոմակայանի կառուցումը պետք է կենտրոնանալ ատոմակայանի երկրորդ էներգաբլոկի արդիականացման աշխատանքների վրա, ատոմակայանի կյանքը մինչև 2036 թվականը երկարացնելու: «Մենք այնքան հարուստ երկիր չենք, որ նման ատոմակայան կանգնեցնենք արագ։ Սրա կյանքը կերկարացնենք, այստեղ փոքր գումարների մասին է խոսքը, ոչ թե միլիարդների մասին։ 2036 թվականից հետո արդեն պետք է ունենանք նորը, որի վրա աշխատանքները պետք է սկսել հիմիկվանից։ Նոր ատոմակայանը ոչ մեկ ամսում, ոչ էլ մեկ տարում չեն կառուցում, դրա համար բավարար ժամանակ է պետք։ Նոր ատոմակայան կառուցելու վերաբերյալ հարցի բարձրացումը ճիշտ էր»,- ասաց Պետրոսյանը։
Մեր զրուցակցի խոսքով՝ պետք է արդեն սկսել ուսումնասիրել, պարզել, թե ինչ բլոկների մասին է խոսքը, ինչ հզորության, Ռուսաստանում կա՞ն նման բլոկներ, մեզ ի՞նչ հզորության բլոկ է ձեռք տալիս: «Այս հարցերի քննարկումները հիմա պետք է սկսվեն, որպեսզի 2036 թվականին արդեն գործողին փոխարինող պատրաստի բլոկ ունենանք։ Սովորաբար մի 8 տարի տևում է նոր բլոկի կառուցումը։ Հետևաբար կրկնում եմ, որ քննարկումները, ֆինանսավորման հարցը պետք է քննարկվի հիմա, քանի որ միլիարդների մասին է խոսքը, եթե ընտրվեն միջին հզորության բլոկներ։ Փաստաթղթերի, հիմնավորումների հարց կա նաև։ Բացի դրանից, եթե ընտրվեն միջին հզորության բլոկներ, ապա պետք է ուսումնասիրվի դրա փորձը։ Պետք է տեսնել՝ որ երկրում են դրանք շահագործել, ինչ փորձ կա, ուսումնասիրել դա։ Չի կարելի անփորձ բան բերել»,- ասաց Պետրոսյանը։
Մեր դիտարկմանը՝ Հայաստանը կարո՞ղ է ինքնուրույն նոր ատոմակայան կառուցել, թե՞ Ռուսաստանի աջակցությունը այս հարցում անխուսափելի է, Պետրոսյանը պատասխանեց. «Ես չգիտեմ՝ դրա համար բյուջեում փող կա, թե չկա, բայց բոլորն էլ գիտեն, որ դրա համար պետք է հովանավոր ունենաս կամ վարկ վերցնես, կամ այլ տարբերակ ընտրվի։ Չգիտեմ՝ որ տարբերակը արդյունավետ կլինի, բայց կրկնում եմ, որ նոր ատոմակայանի կառուցումն անխուսափելի է։ Դրանից կախված է մեր էներգետիկ անվտանգության հարցը»։
Հիշեցնենք, որ 2017 թվականի նոյեմբերի 24-ին Բրյուսելում Հայաստանի և Եվրոպական միության միջև ստորագրված համաձայնագրով Հայաստանը պարտավորվել է փակել Մեծամորի ատոմակայանը։ Նույն համաձայնագրով սահմանվում է նաև նոր ատոմակայանի կառուցում։
