Հայաստանի վարչապետ Նիկոլ Փաշինյանի ապրիլի 7-ի մոսկովյան այցից և ՌԴ նախագահ Վլադիմիր Պուտինի հետ հանդիպումից հետո Հայաստանի նախագահ Արմեն Սարգսյանի հետ է հանդիպել Հայաստանում ԱՄՆ դեսպան Լին Թրեյսին: Արմեն Սարգսյանն ու ԱՄՆ դեսպանը քննարկել են երկկողմ և ռեգիոնալ օրակարգի հարցեր: Ինչպես հայտնել է ԱՄՆ դեսպանատունը, նախագահ Սարգսյանի հետ հանդիպմանը դեսպան Թրեյսին հայտնել է Հայաստանի ժողովրդավարությանը աջակցելու հանձնառությունը, ինչպես նաև արտահայտել Արցախի հակամարտության գործընթացի ներգրավվածության ԱՄՆ պատրաստակամությունը: Ամերիկայի Միացյալ Նահանգները մի կողմից ազդակներ է հղում Հայաստանին իր քաղաքական ներգրավվածության պատրաստակամության համար, մյուս կողմից, ըստ էության, նաև զգուշացնում հետևանքի մասին, որ կարող է լինել հակառակ դեպքում, այսինքն՝ այն պարագայում, երբ ռեգիոնալ հարցերի քննարկման ձևաչափը չվերադառնա Մինսկի խմբի եռանախագահություն, այլ մնա ռուս-թուրքական շրջանակում:
Այստեղ խնդիրները, անշուշտ, շատ են և բազմազան, սակայն ընդհանուր առմամբ, ԱՄՆ ազդակի բովանդակությունը բավականին թափանցիկ հաղորդել է ԱՄՆ պետքարտուղարի Եվրոպայի ու Եվրասիայի հարցերի օգնականի տեղակալ Ջորջ Քենթը, որը օրերս խոսել էր այն մասին, որ Ռուսաստանը չի ուզում հակամարտության ամբողջական և վերջնական կարգավորում, որպեսզի չկորցնի իր ռեգիոնալ ազդեցության լծակները: Միաժամանակ, Քենթը նշել էր, որ Ադրբեջանը ժամանակի ընթացքում կսկսի դժգոհել ՌԴ ռազմական ներկայության հանդեպ: Ամերիկացի դիվանագետը բավականին պարզորոշ ակնարկում է, որ, ԱՄՆ-ին ռեգիոնից դուրս թողնելու պարագայում, Վաշինգտոնը կխաղա Ադրբեջանի դժգոհության կողմում, որովհետև մյուս կողմում իր հետ սառըպատերազմյան դիմակայության մեջ մտած Ռուսաստանն է: Եվ այդ հարաբերակցությունը Հայաստանի համար լրջագույն մարտահրավեր է կայունության ու անվտանգության տեսանկյունից: Բանն այն է, որ այսօր Երևանը, օբյեկտիվորեն խորհելով ընթացիկ կայունության մասին և սերտ աշխատելով Ռուսաստանի հետ, կարիք ունի խորհելու նաև կայունության և անվտանգության վաղվա երաշխիքների, երկարաժամկետ մեխանիզմների մասին, որտեղ արդեն ակնառու է, որ Ռուսաստանին զուգահեռ Միացյալ Նահանգների հետ սերտ աշխատանքը ոչ պակաս անհրաժեշտություն է:
