«Freedom house-ը նշում է, որ նոյեմբերի 9-ին ստորագրված հայտարարությունը խիստ հակասական է, որ այն ոչ թե խաղաղության համաձայնագիր է, այլ ընդամենը զինադադարի հայտարարություն: Այն նաև մտահոգված էր նոյեմբերի 9-10-ին Ազգային ժողովի, կառավարության վրա հարձակումներով, սակայն միաժամանակ մտահոգված է քաղաքացիական հասարակությունների թիրախավորմամբ և այդ կազմակերպությունների հանդեպ սկսված դեզինֆորմացիայի արշավով»,- «Առաջին լրատվական»-ի հետ զրույցում ասաց Հայաստանում ամերիկյան Freedom house-ի ծրագրի համակարգող Սոսի Թաթիկյանը՝ անդրադառնալով Հայաստանում տեղի ունեցած գործընթացների վերաբերյալ Freedom house-ի հայտարարություններին:
Անդրադառնալով ՄԻՊ-ի շուրջ ստեղծված վիճակին և մեծապես կարևորելով ՄԻՊ-ի աշխատանքը՝ մեր զրուցակիցը նկատեց. «Այդ գրասենյակի բյուջեի կրճատումը հակասում է որոշակի միջազգային ստանդարտներին: Եթե ֆինանսական երաշխիքները վերացվեն, գրասենյակը կկորցնի իր անկախությունը և կարող է կորցնել իր «Ա» կլասիֆիկացիան՝ զրկվելով միջազգային կառույցներին իր զեկույցները հասցնելու հնարավորությունից»:
Անդրադառնալով Զանգվածային լրատվամիջոցների մասին օրենսդրական նախաձեռնությանը՝ Սոսի Թաթիկյանը նկատեց. «Մի կողմից՝ Հայաստանում ահռելի քանակով դեզինֆորմացիա կա, և Հայաստանը պետք է ինչ-որ ձևեր գտնի դեզինֆորմացիայի և ֆեյք նյուզի դեմ պայքարելու համար: Սակայն վերջին շրջանում շրջանառության մեջ են դրվել 5 օրենսդրական նախաձեռնություններ, որոնցից 3-ը առնվազն խնդրահարույց են»:
«Ինչպես գիտեք, եռապատկվել են հեղինակազրկման և վիրավորանքի համար մամուլի համար նախատեսվող տույժերը: Միգուցե ապահովված և կայացած լրատվամիջոցի համար 5.700 կամ 11.400 դոլարը մեծ գումար չէ: Սակայն ֆինանսապես այդպես ապահով են ոչ անկախ լրատվամիջոցները, որոնք ֆինանսավորվում են օլիգարխների կամ մեծ ֆինանսական կապիտալ ունեցող անձերի կամ կազմակերպությունների կողմից: Արդյունքում տուժում են փոքրաթիվ անկախ լրատվամիջոցները»,- ընդգծեց նա:
Առավել մանրամասն՝ տեսանյութում:
